Өскемен-Алматы трассасының Аягөз қаласына жақын түстағы учаскесінде жол апаты болып, бір сарбаз бен оның ата—анасы қаза тапты. Бұл туралы Қорғаныс министрлігінің Құрлық әскерлері қолбасшылығы әлеуметтік желіде жариялады, деп хабарлайды F16.kz.
2025 жылғы 28 маусымда жол-көлік оқиғасы салдарынан Аягөз гарнизоны әскери бөлімінің мерзімді қызметтегі сарбазы және оның қысқа мерзімге демалысқа шыққанда қасында бірге болған ата-анасы қаза тапты, – делінген ҚР Құрлық әскерлерінің баспасөз қызметі таратқан ақпаратта.
Абай облысы полиция департаментінің мәліметінше, жол апатынан төрт адам қаза тапқан.
Алдын ала мәлімет бойынша, 62 жастағы Toyota Lumiere көлігінің жүргізушісі қарсы бағытқа шығып кетіп Toyota Land Cruiser көлігімен соқтығысқан. Жол-көлік оқиғасы салдарынан Toyota Lumiere көлігінің жүргізушісі мен үш жолаушы оқиға орнында көз жұмды. Аталған дерек бойынша сотқа дейінгі тергеу басталды. Қажетті тергеу әрекеттері жүргізіліп, сот-сараптамалары тағайындалды, – деп хабарлады полиция қызметі.
Құрлық әскерлері қолбасшылығы қайтыс болған сарбаздың туған-тыстарына жан-жақты көмек көрсетілетінін, оның ішінде қаза тапқандардың денесін тасымалдауды жүзеге асыратынын мәлім етті.
