Қаржы нарығын реттеу және дамыту агенттігі жол-көлік оқиғалары кезінде автокөлікті қаржылық тұрғыда қорғау тетіктері туралы түсініктеме берді, деп хабарлайды F16.kz.
Агенттік өкілдерінің айтуынша, міндетті автосақтандыру жол апаты салдарынан үшінші тұлғаларға — яғни өзге адамдардың өмірі мен денсаулығына немесе мүлкіне келтірілген зиянды өтеуге бағытталған. Алайда жол апатына кінәлі деп танылған жүргізушінің өз көлігіне келген шығын бұл сақтандыру түрі арқылы өтелмейді. Ал ерікті автосақтандыру (КАСКО) апатқа себепкер болған тұлғаның да сақтандырылған көлігі зақымданған, жоғалған немесе толықтай жарамсыз болған жағдайда шығынды өтеуді қарастырады. Мұндай сақтандыру шарттары тәуекел түрлеріне, франшиза көлеміне, жөндеу жүргізу тәртібіне, шығынды өтеу жолдарына және жүргізушінің кінәсінің деңгейіне қарай әртүрлі болуы мүмкін, сонымен қатар қосымша сервистік қызметтерді де қамтиды.
Агенттік дерегіне сәйкес, қазір Қазақстанда ерікті автосақтандырумен айналысуға лицензиясы бар 15 сақтандыру компаниясы жұмыс істейді. 2025 жылдың алғашқы 11 айында бұл ұйымдар 77,3 млрд теңге көлемінде келісімшарт жасасып, жол апатына тап болған көлік иелеріне 26,5 млрд теңге көлемінде өтемақы төлеген.
Сондай-ақ мамандар ерікті автосақтандырудың құны міндетті сақтандырумен салыстырғанда бірнеше есе қымбат екенін атап өтті. Оның бағасы сақтандыру пакеті мен көліктің маркасына және моделіне байланысты өзгеріп отырады. Ал міндетті автосақтандыру полисінің орташа бағасы шамамен 15 мың теңге көлемінде.
