ҚР Мемлекеттік қызмет істері агенттігінің ШҚО бойынша департаменті азаматтардың мемлекеттік қызмет саласындағы заңды құқықтары мен мүдделерін қамтамасыз ету бойынша жұмыс жүргізеді. Жыл басынан бері 22 қызмет алушының құқығы қалпына келтірілді, деп хабарлайды F16.kz.
Биыл ақпанда Маркакөл ауданы тұрғындары атынан шағым түскен. Тұрғындарға Маркакөл ауданының жер комиссиясының қорытындысы негізінде жеке қосалқы шаруашылық жүргізу үшін жер учаскелері берілмеген.
Тексеру барысында мемлекеттік көрсетілетін қызметті беру рәсімінде елеулі заң бұзу анықталды. ҚР Әкімшілік рәсімдік-процестік кодексінің 72-бабына сәйкес әкімшілік орган, лауазымды адам әкімшілік істі дұрыс қарау үшін маңызы бар нақты мән-жайларды жан-жақты, толық және объективті зерттеу үшін шаралар қабылдауға міндетті. Әкімшілік орган, лауазымды адам әкімшілік істің дәлелдеріне, нақты мән-жайларына байланысты болмайды және әкімшілік істі толық көлемде тексереді. ҚР Жер Кодексінің 43-бабының 2-бөлігіне сәйкес, егер оған оның құрамының жалпы санының кемінде үштен екісі қатысса, жер комиссиясының отырысы заңды болып саналады. Алайда, кворумның жоқтығына қарамастан Маркакөл ауданының жер комиссиясы жер учаскелеріне құқық беру мүмкіндігінің жоқтығы туралы қорытынды шығарды, — дейді ҚР Мемлекеттік қызмет істері агенттігі ШҚО бойынша департаментінің басшысы Ержан Айқымбеков.
Сонымен қатар өтініштерді қарау барысында көрсетілетін қызметті беруші ҚР Әкімшілік рәсімдік-процестік кодексінің 73-бабын бұза отырып, мемлекеттік қызмет көрсетуден бас тарту кезінде міндетті тыңдау рәсімін өткізбегені анықталған.
Департаменттің жедел араласуының арқасында көрсетілетін қызметті алушылардың құқықтары қалпына келтірілді, аудан әкімінің атына өтініштерді қайта қарау қажеттілігі туралы хат жолданды. Кінәлі лауазымды тұлға тәртіптік жауапкершілікке тартылады.
