Жыл басынан бері облыстық полиция департаментінің қызметкерлері 265 есірткі қылмысының бетін ашып, 600 килограммнан астам түрлі есірткі заттары мен 7 килограммнан артық синтетикалық есірткі тәркіледі, деп хабарлайды F16.kz.
Одан бөлек, облыс аумағына жеткізілмек болған төрт ірі есірткі партиясының жолы кесіліп, 11 фитозертхана толығымен жойылды.
Интернет кеңістігінде де үлкен жұмыс атқарылды. Есірткі жарнамалаумен және таратумен айналысқан 1235 интернет-сайт бұғатталды. Есірткі сатушылар қолданған 5800-ден астам банк карталары бұғаттауға жіберілді. Бұл карталар арқылы айналымға шыққан қаражат көлемі 117 миллион теңгені құрайды, — дейді ШҚО ПД Есірткі қылмысына қарсы іс-қимыл басқарма басшысының міндетін атқарушы полиция полковнигі Абай Бақтияров.
Ішкі істер министрі жариялаған «Профилактика жылы» аясында жастар арасында нашақорлықтың алдын алу бағытында ауқымды жұмыстар жүргізілген. Жыл көлемінде 600-ден астам есіркіге қарсы іс-шаралар ұйымдастырылды.
Полиция департаменті есірткіні заңсыз сақтау, тасымалдау, сату немесе тарату ауыр қылмыс болып саналатынын және мұндай әрекеттер үшін заң бойынша қатаң жаза, оның ішінде бас бостандығынан айыру жазасы көзделгенін ескертеді.
