Бүгін Өскеменде КСРО-ның спорт шебері, Қазақ КСР-інің бірнеше дүркін чемпионы, халықаралық жарыстардың қатысушысы даңқты бапкер Рахымғазы Көшербаевты еске алуға арналған марафон өтті, деп хабарлайды F16.kz.
Оған әртүрлі жастағы барлығы 160 желаяқ қатысты. Марафоншылар Аблакет ауданындағы СЭС-тен бастап Ертісті бойлай жүгіріп жағалаудағы «Ғашықтар аллеясында» мәреге жетті. Жарыс жолының ұзындығы – 10 шақырым. Сайыс ережесі бойынша қатысушылар бірнеше жас санатына бөлініп сынға түсті. Атап айтқанда, 17 жасқа дейін, 18–19 жас, 30–39 жас, 40–49 жас, 50–59 жас, 60–69 жас және 70 жастан жоғары. Ауа райының қолайсыздығына қарамастан жүгіруге бел буған спортшылардың да, оларды қолдауға келген жанкүйерлердің де көңіл күйі көтеріңкі болды. Қатарынан озған жеңімпаздар мен жүлдегерлерге медальдар, дипломдар және естелік сыйлықтар табыс етілді.
Жеңіл атлетикамен, оның ішінде жүгірумен айналысқаныма үш-төрт жыл ғана болды, оған дейін спорттың басқа түрлерімен шұғылдандым. Бала кезімде күрес, боксқа бардық, кейін футбол ойнадық, үстел теннисінен жақсы нәтижелерге жеттім. Кейінгі бір-екі жыл марафонға қызығып, жүгіріп жүрмін. Әзірге айтарлықтай жетістігім жоқ. Алдағы уақытта жақсы көрсеткіш көрсетемін деп өзімді жігерлендіріп қоямын. Жалпы, спорт ең бірінші адамның өзіне керек. “Тәні саудың, жаны сау” демей ме. Жастарға спортпен шұғылдануға кеңес беремін, – деді Өскемен тұрғыны Данияр Нағашыбек.
Рахымғазы Көшербаев саналы ғұмырының 43 жылын спортқа арнап, көптеген әлем чемпионын тәрбиеледі. Ұзақ жылдар бойы «Восток» спорт клубында жаттықтырушы болып еңбек етті, өңірде жеңіл атлетиканың дамуына үлкен үлес қосты.
Жарыстың марапаттау рәсіміне арнайы келіп қатысқан спортшының жұбайы Зәуре Көшербаева бұл марафонның облыс спорты үшін маңызды оқиға болғанын атап өтті.
Ауа райының қолайсыздығына, жел мен жаңбырға қарамастан Рахымғазы Нұрғалиұлының рухына тағзым ету үшін жиналдыңыздар. Отбасымыздың атынан осы жарысқа қатысқан барлық спортшыларға және осы сайысты ұйымдастырушыларға шын жүректен алғыс айтамын. Салауатты өмірді серік еткен жастарымыз көбейе берсін, – деді Зауре Көшербаева.
Айта кетейік, облыстық денешынықтыру және спорт басқармасы 2026 жылдан бастап бұл марафонды ресми жарыс күнтізбесіне енгізуді жоспарлап отыр.
