Мәдениет және ақпарат министрі Аида Балаева сыртқы істер министрі Мұрат Нұртілеу мен ҰҚК—нің бірқатар жоғары лауазымды қызметкерінің ұсталғаны туралы ақпаратты жоққа шығарды, деп хабарлайды F16.kz.
Ведомство басшысы сыртқы істер министрі мен Ұлттық қауіпсіздік комитетінің бірнеше жоғары лауазымды қызметкері ұсталды деген ақпарат шындыққа жанаспайтынын мәлімдеді.
Ақпараттың шынайылығын тексеру міндеті, кінәсіздік презумпциясы қағидасы, сондай-ақ журналистік этика бар екенін есте сақтау қажет. «Хайп» қуып, көбіне расталмаған деректерге жүгінген кезде журналистер мұндай ақпараттың азаматтарға және олардың жақын туыстарына зиян келтіруі мүмкін екенін, олардың ар-намысы мен қадір-қасиетіне нұқсан тигізетінін, шын мәнінде жала екенін ұмытпауға тиіс, — деді министр.
Сондай-ақ министр жалған ақпарат таратқаны үшін әкімшілік және қылмыстық жауапкершілік қарастырылғанын еске салды.
Бұған дейін Orda.kz басылымы құқық қорғау органдарындағы дереккөздерге сілтеме жасай отырып, Қазақстанның сыртқы істер министрі Мұрат Нұртілеу, кәсіпкер Гаджи Гаджиев және ҰҚК-нің бірқатар жоғары лауазымды қызметкері ұсталды деген ақпарат таратқан болатын.
