Шығыс Қазақстан облысында үлескерлердің қаражатын жеке мақсаттарына жұмсаған құрылыс компаниясы сотқа тартылды. Одан бөлек, өңірде заңсыз кен өндіру, алкоголь өнімдерін заңсыз сақтау, және интернеттегі қаржылық құқық бұзушылықтар да анықталып, ісі сотқа жолданған. Бұл туралы Экономикалық тергеп-тексеру департаменті Тергеу басқармасының басшысы Қуат Рахимбаев мәлімдеді, деп хабарлайды F16.kz.
Үлескерлердің қаражатын мақсатсыз пайдалану дерегі бойынша құрылыс компанияларына қатысты қылмыстық іс сотқа жолданды. Заңсыз жолмен алынған қаражат көлемі 1,2 млрд теңгені құрады, — деді Қуат Рахымбаев.
Енді пәтер сатып алмақ болған үлескерлерге келтірілген шығынды өтеу тәртібі сотта айқындалады.
Сондай-ақ тиісті лицензиясыз кен өндіру, тасымалдау және өткізу дерегі бойынша да қылмыстық іс сотқа жолданды. Қылмыстық жолмен алынған қаражатқа сатып алынған мүлік мемлекет кірісіне тәркіленіп,1 млрд 53 млн теңге залалды өндіру туралы талап қанағаттандырылды, — деп атап өтті Қуат Рахымбаев.
Ал, облыс орталығында алкоголь өнімдерін заңсыз өндіру және сақтау үшін пайдаланылған төрт қойма анықталған. Сот қаулысымен мүлікті тәркілеу туралы шешім қабылданды.
Интернеттегі заңсыз қызметтерге қарсы күрес аясында 2025 жылы онлайн-казино мен құмар ойындарға қатысты 667 сілтеме бұғаттауға жіберіліп, 612-сі бұғатталды. Жыл басынан бері жолданған 155 сілтеменің 124-іне шектеу қойылды. Бұдан бөлек, қаржы пирамидалары мен заңсыз криптоайырбастау пункттерінің белгілері бар 300-ден астам сайт бұғатталды, — деді Экономикалық тергеп-тексеру департаменті Тергеу басқармасының басшысы.
Департамент экономикалық құқық бұзушылықтардың жолын кесу және мемлекет пен азаматтардың қаржылық мүдделерін қорғау бағытындағы жұмысты әлі де жалғастырады.




