Елімізде Балалардың әл-ауқаты индексінің қорытындылары аясында ауқымды әлеуметтік зерттеу жүргізілді. Сауалнамаға балалар, ата-аналар және педагогтер қатысты, деп хабарлайды F16.kz тілшісі Оқу-ағарту министрлігіне сілтеме жасап.
Зерттеу нәтижелеріне сәйкес, балалардың құқықтық қорғалуының орташа деңгейі 90,3%-ға жетті. Бұл олардың өз құқықтары туралы хабардарлығы жоғары екенін және өздерін қорғау тетіктерін қолдана алатынын көрсетеді. Алдыңғы қатардан Қостанай (94,5%), Маңғыстау (93,5%) және Қызылорда (93,1%) облыстары көрінді.
Маңызды көрсеткіштердің бірі – жасөспірімдердің өз өміріне қанағаттану деңгейі. 10-18 жас аралығындағы балалар мен жасөспірімдердің шамамен 85%-ы өзінің әлеуметтік және психологиялық жағдайын оң бағалаған. Бұл бағытта ең жоғары нәтиже Қостанай облысында (90,1%), Шымкент қаласында (88,7%) және Қызылорда облысында (88,5%) тіркелді.
Зерттеу барысында отбасы ішіндегі сенім деңгейіне ерекше көңіл бөлінді. Нәтижесінде жасөспірімдердің 90,4%-ы ата-анасымен ашық сөйлесіп, ой-пікірін жеткізе алатыны белгілі болды. Ең жоғары көрсеткіштер Ұлытау облысында (97,5%), Астана қаласында (95,3%) және Қостанай облысында (94,7%) байқалды.
– Балалар әл-ауқаты индексі – баланың денсаулығы, білімі, отбасы және әлеуметтік ортасын қамтитын маңызды көрсеткіш. Біздің мақсатымыз – ең алдымен балалардың өз үнін есту. Зерттеу нәтижелері олардың өздерін қауіпсіз сезінетінін, ата-анасымен жақсы қарым-қатынаста екенін және болашағына сеніммен қарайтынын көрсетіп отыр, – деді ҚР Оқу-ағарту министрлігі Балалардың құқықтарын қорғау комитетінің төрағасы Насымжан Оспанова.
Айта кетейік, 2024 жылдың қорытындысы бойынша Қазақстанда Балалардың әл-ауқаты индексі тұрақты өсім көрсетіп, орташа республикалық көрсеткіш 2,5 пунктке артып, 58,6 балға жетті.
