ШҚО-да есірткі қылмысына қатысы бар деген күдікпен ағайынды жігіттер ұсталды, деп хабарлайды F16.kz тілшісі Polisia.kz сайтына сілтеме жасап.
Өскемен қаласы полиция басқармасының есірткі қылмысына қарсы іс-қимыл тобы облыс прокуратурасының үйлестіруімен 23 және 21 жастағы жергілікті екі тұрғынды – туған ағайындыларды ұстады.
Тінту барысында 21 жастағы азаматтан жалпы салмағы 18,32 грамм болатын «альфа-PVP» психотроптық заты салынған 24 орам, ал 23 жастағы азаматтан салмағы 19,02 грамм болатын дәл осындай зат салынған 25 орам табылып, тәркіленді.
Тергеу нәтижесінде белгілі болғандай, ағайындылардың үлкені биыл тамыз айының басында мессенджер арқылы «қоймашы-курьер» қызметіне орналасқан. Әр жасырған «қоймасы» үшін оған 2 750 теңге көлемінде сыйақы төлеуге уәде етілген. Ол бір күннің ішінде 50-ден астам «қойма» жасап үлгерген. Алайда, куратордың уәдесіне қарамастан, ешқандай төлем алмаған. Ал оның 21 жастағы інісі ағасының өтініші бойынша орамаларды жасырғанын айтып, олардың ішінде есірткі барын білмегенін алға тартқан.
Көп ұзамай полицейлер жасырын орындарды анықтап, барлық «қойманы» жойды. Қазіргі уақытта аталған дерек бойынша сотқа дейінгі тергеу жүргізілуде.
– Полиция тұрғындарға ескертеді: Есірткі заттарын сақтау немесе таратуға қатысу – тіпті туыс не таныстың өтініші бойынша болса да – қылмыстық жауапкершілікке әкеліп соғады. Мессенджерлер мен әлеуметтік желілерде жарияланатын «қоймашы-курьер» секілді жұмыс орындары – жастарды есірткі қылмысына тартудың тәсілі. Уәде етілген жеңіл табыс ақыр-соңында курьерлердің бас бостандығынан айырылуына алып келеді, – деп жазады дерек көзі.
