Шығыс Қазақстан облысының Қытаймен іргелес Марқакөл ауданында тағы да жер қойнауын заңсыз пайдалану дерегі анықталды. Күдіктілер әкімшілік жауапкершілікке тартылды, деп хабарлайды F16.kz.
Биылғы 31 тамызда облыстық экология департаменті мамандары Марқакөл аудандық полиция бөлімінің қызметкерлерімен бірлесіп Шаңдыбұлақ-9 учаскесінде тексеру жүргізді. Тексеру барысында экологиялық заңнама талаптарының бұзылғаны, яғни заңсыз жер қойнауын пайдалану дерегі анықтады.
Нәтижесінде «Алтай-2024» ЖШС-ға қатысты еліміздің Әкімшілік құқық бұзушылық туралы кодексінің 332-бабы 2-бөлігі және 328-бабы 4-бөлігі бойынша әкімшілік жауапкершілік шаралары қолданылды. Іс материалдары сот органдарына жолданды, – деп хабарлады экология департаментінің өкілдері.
Экология департаменті облыс аумағында заңсыз жер қойнауын пайдалану фактілерін анықтау және жолын кесу жұмыстары жүйелі түрде жалғасып жатқанын атап өтті. Бұл ретте экологиялық заңнаманың сақталуына, табиғи ресурстарды тиімді игеруге және жер қойнауын пайдалану саласындағы құқық бұзушылықтардың алдын алуға баса назар аударылған.
Еске сала кетсек, бұған дейін заңсыз алтын өндірушілер Марқакөл ауданының Қалжыр өзенін ластап жатқанын жазғанбыз.
