Марқакөл ауданында кен іздеген компаниялар табиғаттың тас-талқанын шығарып, Қалжыр өзенін ластап жатыр. Бұл туралы Facebook әлеуметтік желісінде белгілі ғалым, тарихшы, жазушы Тұрсынхан Зәкенұлы жазды, деп хабарлайды F16.kz.
Тас-талқан табиғат, пайда іздеген жеке компаниялар! Бұларды тексеретін, қой дейтін біреу бар ма? Қайда табиғат қорғау мекемелері, қайда облыс басшылары? Осы алтын мемлекет қазынасына құйылып жатса бір сәрі, қайдағы бір көлденең көк аттылардың пайдасына кетіп жатыр. Бұл недеген масқара, ағайын!? Бұл елдің иесі жоқ па?! – деп күйінген жазушы Зәкенұлы Парламент Мәжілісінің депутаты Ерлан Сайыровтан мәселенің мән-жайын анықтауды сұрады.
Әлеуметтік желіде тараған жазбамен бірге Тұрсынхан Зәкенұлы бейнебаянды қоса жариялады. Онда бейнебаян авторы былай дейді: «Міне Қалжырдың тура шетінде алтын қазып жатыр. Екі бассейн бар. Бассейннен аққан су көпір арқылы Қалжырға қосылады. Бір айда насты Қалжыр неге лай десек, осыдан екен. Қаншама «КАМАЗ», экскаватор, жүк тиегіш тракторлар мен ховалар жүр. Рұқсат құжаттарыңды көрсет десек көрсете алмайды, бір-біріне сілтейді».
Желі қолданушыларының қызу талқысына түсіп, көптің наразылығын туғызған Қалжыр өзеніндегі жағдайға байланысты Марқакөл ауданының әкімдігі жауап берді.
Аталған факт бойынша қылмыстық іс қозғалған. Экологиялық залалды анықтау мақсатында аталмыш қылмыстық істен іс-құжаттар жеке өндіріске бөлініп, ШҚО бойынша экология департаментіне жолданған. Қазіргі таңда сотқа дейінгі тергеп-тексеру амалдары жалғасуда, – деп жазды аудан әкімдігі.
Шығыс Қазақстан облысының Марқакөл ауданы 2023 жылы Президент Қасым‑Жомарт Тоқаевтың Жарлығымен қайта құрылған. Бүгінде Мемлекет басшысы шекаралық аймақтарды дамытуға ерекше мән беріп, Үкіметке және жергілікті атқарушы билікке нақты міндеттер жүктеген-ді.
