2025 жылдың сегіз айында 9 586 этникалық қазақ тарихи отанымен табысып, қандас мәртебесін алды. Жалпы 1991 жылдан бері республикаға 1 миллион 157,6 мың этникалық қазақ оралған, деп жазады F16.kz.
Еңбек және халықты әлеуметтік қорғау министрлігінің ақпараты бойынша жыл басынан Қазақстанға оралған қандастардың 45,7% Өзбекстаннан, 41,8% – Қытайдан, 4,6% – Түркіменстаннан, 2,7% – Моңғолиядан, 2,6% – Ресейден және 2,6% басқа елдерден келген.
Осы жылғы 1 қыркүйектегі жағдай бойынша еңбекке қабілетті жастағы қоныс аударушылар үлесі 58,7%-ды, еңбекке қабілетті жастан кіші 32,3%-ды және зейнеткерлер 9%-ды құрайды.
Еңбекке қабілетті жастағы қандастардың 15,4%-ының жоғары білімі, 29,7%-ының орта кәсіби білімі және 52,3%-ының жалпы орта білімі бар.
Көшіп келген этникалық қазақтар республиканың түрлі өңірлеріне қоныстанды. Сонымен бірге, қандастарды қоныстандыру үшін еңбек күші тапшы бірқатар өңір анықталған. Олардың арасында Ақмола, Абай, Қостанай, Павлодар, Атырау, Батыс, Шығыс және Солтүстік Қазақстан облыстары бар.
– Қоныстандыру өңірлерінде 2025 жылға арналған қандастарды қабылдау квотасы 2 309 адамды құрайды. 2025 жылғы 1 қыркүйектегі жағдай бойынша қоныстандыру өңірлеріне 1 467 қандас қоныс аударды, – деп хабарлайды дерек көзі.
Жоғарыда аталған өңірлерге қоныстанған қандастарға көшуге субсидия түрінде мемлекеттік қолдау шаралары ұсынылады. Атап айтқанда:
- бір мезгілде отағасына және отбасының әрбір мүшесіне 70 АЕК (275,2 мың теңге) мөлшерінде;
- тұрғын үй жалдауға және коммуналдық қызметтерге ақы төлеуге – бір жыл ішінде 15-тен 30 АЕК (58,9-ден 117,9 мың теңгеге дейін) мөлшерінде қолдау көрсетіледі.
Жыл басынан бері 594 қандасқа түрлі қолдау шаралары көрсетілді. Атап айтқанда, 237 адам тұрақты жұмысқа орналастырылды.
