Темекі тұқылын жерге тастаған тұрғын 40 сағат қоғамдық жұмысқа тартылды, деп хабарлайды F16.kz.
3 қыркүйек күні қала тұрғыны Есенберлин көшесі бойындағы қоғамдық орындардың бірінде темекі шегіп, тұқылын жерге тастаған. Бұл әрекет Қазақстан Республикасының Әкімшілік құқық бұзушылық туралы кодексінің 434-2-бабының 1-бөлігінде көзделген құқық бұзушылық болып табылады. Істің мән- жағдайына байланысты аталған баптың санкциясы ретінде айыппұл немесе қоғамдық жұмыстар көзделген, — дейді соттың баспасөз қызметі.
Сот отырысында құқық бұзушы кінәсін толық мойындап, жасаған ісіне өкінетінін жеткізді. Айыппұл төлеу мүмкіндігінің жоқтығын және жазаны қоғамдық жұмыс түрінде өтеуге ерікті түрде келісім бергенін ескере отырып, сот оған 40 сағат қоғамдық жұмыс түріндегі әкімшілік жаза тағайындады.
Қаулы заңды күшіне енген жоқ.
