Алдағы уақытта Шығыс Қазақстан облысында құсбегіліектен Азия чемпионаты өтуі мүмкін. Бұл туралы бүгін Ұлан ауданында басталған «Шығыс Салбурыны-2025» халықаралық фестивалінде белгілі болды, деп хабарлайды F16.kz тілшісі.
Фестивальдің ашылу салтанатына қатысқан Ұлан ауданының әкімі Арман Бекбосынов болашақта бұл жерде Азия елдері құсбегілері арасындағы құрлықтық доданы да өткізу жағы қарастырылып жатқанын мәлім етті.
– Құрметті қауым, қадірлі құсбегілер мен қонақтар! Бүгін біз үшін ерекше күн. Бәріміз ата-бабаларымыздан келе жатқан асыл мұраның бірі – саятшылық өнерін ұлықтайтын жарқын оқиға, осымен бесінші рет ұйымдастырылып отырған «Шығыс Салбурыны-2025» халықаралық фестивалінің куәгері болып отырмыз. Бұл – спорттық іс-шара ғана емес, сонымен бірге ұлттың рухани байлығын дәріптейтін, дәстүр мен тарихты жаңғыртатын айтулы оқиға, – деді салтанатты шараға қатысқан аудан әкімі.
Жалпы, Ұлан жерінде бүркітшілердің сайысы 2020 жылдан бастап тұрақты түрде өткізіліп келетінін айту керек. Алғашқыда ауыл-аудан деңгейінде өткізілген шара бүгінде халықаралық мәртебеге ие болуда. Мұны Арман Бекбосынов та ерекше атап өтті.
– Бұған дейінгі іс-шаралардай биылғы фестиваль де жоғары деңгейде өтетініне күмәніміз жоқ. Осындай фестивальдің арқасында ұлттық мәдениетіміз бен өнеріміз барынша насихатталып, әлемдік деңгейде танымалдылыққа ие болатынына сенім мол. Енді бұл бағыттағы жұмыстарды ширата түсу керек. Өздеріңіз де білетін боларсыздар, жақында Моңғолияның Баян-Өлгей аймағында өткен Азия біріншілігінде жерлестеріміз екінші орынға ие болған еді. Осы ретте біздің жерде де, Ұлан ауданында да осындай құрлықтық жарыс өткізуге болады деп сенемін. Бұған әлеуетіміз жетеді. Енді осы бағытта жұмыла әрекет етуіміз керек. Барша қатысушыны облыс басшылығы атынан фестивальдің басталуымен құттықтаймын! – деді А.Бекбосынов.
Айта кетейік, биылғы шараға алты елдің құсбегілер қатысып жатыр. Оның ішінде 87 бүркітші, 11 қаршыға мен 14 ителгі иесі бар. Барлығы 104 қатысушы тіркелген. Сонымен қатар ұлттық спортты насихаттау мақсатында асау үйрету мен садақ атудан да сайыстар өтпек.
