Алаяқтар Жол қозғалысы ережелерін бұзу туралы жалған хабарламалар жібере бастады, деп хабарлайды F16.kz.
Белгілі болғандай, хаттар мен хабарламалар электрондық поштаға және мессенджерлерге келіп түсуде. Хабарламаның ішінде жүргізушінің деректері, көлік нөмірі мен «айыппұлды төлеу» сілтемесі болады.
Алайда бұл – фишингтік шабуыл. Егер сіз банк картаңыздың деректерін енгізсеңіз, алаяқтар сіздің шотыңызға қол жеткізіп, барлық қаражатыңызды жымқыруы мүмкін. Кейбір жағдайларда сілтемеде құрылғыдан жеке деректерді ұрлауға арналған вирус та болады.
Бүгінде мұндай шабуылдар Ресей мен АҚШ-та көп тіркелген, сондықтан алдағы уақытта Қазақстанда да осындай алаяқтық схеманың таралу қаупі бар.
Мамандар еске салады:
Әкімшілік айыппұл салу туралы ресми хабарламалар тек 1414 қысқа нөмірінен жіберіледі және онда ешқандай төлем сілтемелері болмайды. Айыппұлдар туралы ақпарат egov.kz порталында және банктердің мобильді қосымшаларында ғана беріледі.
Егер сіз 1414 нөмірінен келген хабарламада төлем жасауға арналған сілтемені көрсеңіз – бұл алаяқтық! Мұндай хабарламаларды алаяқтар жібереді!
Мамандар кеңесі:
- Күмән тудыратын хаттардағы сілтемелерге өтпеңіз және тіркемелерді ашпаңыз;
- Айыппұлдар туралы ақпаратты тек ресми ресурстардан тексеріңіз. Олар: egov.kz, qamqor.gov.kz, банктердің мобильді қосымшалары.
Егер сіз сілтемеге өтіп, карта деректерін енгізіп қойсаңыз:
- Банктік картаңызды шұғыл бұғаттаңыз;
- Алаяқтық туралы банкіңізге және полицияға 102 нөмірі арқылы хабарлаңыз;
- Құрылғыны вирустарға тексеріңіз.
– Сақ болыңыз! Жақындарыңызға ескертіңіз! Алаяқтарға мүмкіндік бермеңіз! – деп ескертеді мамандар.
