Ішкі істер министрлігі «Заң және Тәртіп» қағидасын іске асыруды жалғастыруда. Биылғы 9 айда еліміз бойынша есірткіге қатысты 6 мыңнан астам құқықбұзушылық анықталды, деп хабарлайды F16.kz тілшісі Polisia.kz сайтына сілтеме жасап.
Дерек көзі таратқан ақпаратқа сенсек, жыл басынан бері шамамен 3 мың қылмыс тіркелсе, оның 1 700-і есірткі сату фактісі болған.
– Заңсыз айналымға 26 тоннадан астам түрлі есірткі түрлерінің, оның ішінде бір тоннадан астам синтетикалық заттардың түсуіне жол берілмеді. Бұл 11 миллионнан астам бір реттік дозаға тең. Осылайша миллиондаған азаматтардың денсаулығы мен мыңдаған отбасылардың тағдыры қорғалды. Мақсатты жедел-іздестіру іс-шараларының нәтижесінде 16 ұйымдасқан қылмыстық топ жойылды, оның бесеуі трансұлттық сипаттағы топқа жатады. Осы топтардың басшылары мен белсенді қатысушылары ұсталып, 950 келіден астам есірткі тәркіленді. 12 синтетикалық есірткі өндіретін зертхананың және 93 каннабис өсірілетін фитозертхананың қызметі тоқтатылды. Есірткі өндіруге пайдаланылған 23 тоннадан астам химиялық заттар мен 17 тонна прекурсор тәркіленді, – деді ІІМ есірткі қылмысына қарсы іс-қимыл комитетінің төрағасы Данияр Мейірхан.
Бұдан бөлек, есірткі жарнамасына қатысты 170 қылмыстық іс қозғалып, күмәнді операцияларға қатысы бар 45 мыңнан астам банк шоты бұғатталыпты. Бұл шамамен 2,5 миллиард теңгенің қаражаты.
– Есірткі жолына түскен әрбір адам бір нәрсені анық түсінуі керек: еш уақытта жазадан құтылу мүмкін емес. Бұл бағыттағы жұмыс жүйелі түрде жалғасуда, – деді Д.Мейірхан.
