Соңғы жылдары елімізге Қытайдан келушілер саны 24 есеге, Үндістаннан – 40 есеге, ал Түркиядан үш есеге артқан. Бұл туралы Денсаулық сақтау министрі Ақмарал Әлназарова мәлім етті, деп хабарлайды F16.kz.
Астанада алғаш рет медициналық туризм, фармацевтикалық индустрия және денсаулық сақтау саласына инновациялық технологияларды енгізу мәселелеріне арналған халықаралық ғылыми-тәжірибелік конференция өтті. Конференция жұмысына қатысқан еліміздің Денсаулық сақтау министрі Ақмарал Әлназарова Мемлекет басшысы Қасым-Жомарт Тоқаевтың 2025 жылғы 8 қыркүйектегі Жолдауында медициналық туризмді дамыту мемлекеттік саясаттың басым бағыттарының бірі ретінде айқындалғанын атап өтті. Сондықтан қазір бұл салаға айрықша көңіл бөлініп отыр.
– Бұған дейін біз медициналық туризмнің әлеуеті туралы айтсақ, бүгінде бұл әлеует нақты нәтижеге айналды. Соңғы бес жылда туристер ағыны бес еседен астам өсті, соның ішінде медициналық туризм де айтарлықтай қарқын алды. Қазақстан әлемдік медициналық туризм картасында жаңа орталыққа айналуда, – деді министр.
Белгілі болғандай, соңғы жылдары Қытайдан келушілер саны 24 есеге, Үндістаннан – 40 есеге, ал Түркиядан үш есеге артқан. Қазақстан қолжетімді бағамен жоғары сапалы медициналық қызмет көрсететін ел ретінде өз беделін нығайтып келеді.
Бүгінде елімізде халыққа жоғары технологиялық медициналық көмектің 80 түрі қолжетімді. Қазақстан заманауи емдеу технологияларын енгізу бойынша өңірлік көшбасшы болып саналады. Елде протондық және гамма-терапия, роботтандырылған операциялар, нейромодуляция және трансплантацияның инновациялық әдістері сәтті қолданылуда.
Ақмарал Әлназарова елдің табиғи сауықтыру ресурстарын дамытудың маңыздылығына да назар аударды.
– Бұл – қайталанбас стратегиялық артықшылық: бірегей термалды бұлақтар, Мерке радонды сулары, Бурабайдың тау-көл курорттары – мұның барлығы Қазақстанды медициналық және сауықтыру туризмінің орталығына айналдырады, – деді министр.
