Үлкен Нарын ауданының Новохайрузовка ауылында жаңа фельдшерлік-акушерлік пункттің (ФАП) құрылысы қарқынды жүріп жатыр. Жаңа медициналық нысан биылғы тамыз айының соңына дейін пайдалануға беріледі, деп хабарлайды F16.kz сайты.
Аудан әкімі Елдос Байрахметовтің айтуынша, қазіргі таңда ауылдағы қолданыстағы ФАП ғимаратының техникалық жағдайы талапқа сай емес. Сараптама қорытындысы бойынша нысан апатты деп танылған. Тіпті ғимарат шатырының бір бөлігі опырылып түскендіктен, тұрғындардың қауіпсіздігін қамтамасыз ету мақсатында жаңа медициналық мекеме салу туралы комиссиялық шешім қабылданған.
– Құрылыс жұмыстары мамыр айының басында басталды. Жоспарға сәйкес, тамыз айының соңына дейін жаңа фельдшерлік-акушерлік пункт пайдалануға беріледі. Медициналық құрал-жабдықтармен қамтамасыз ету жұмыстарын облыстық денсаулық сақтау басқармасы жүргізеді, – деді аудан әкімі.
Жаңа ФАП қазіргі апатты ғимараттың маңында салынып жатыр. Қазір жұмыс істеп жүрген медицина қызметкерлері жаңа нысан іске қосылғаннан кейін толықтай сонда көшіріледі. Осылайша ауыл тұрғындары заманауи әрі қауіпсіз жағдайда алғашқы медициналық көмекті ала алады.
Ал ескі апатты ғимарат бұзылып, оның орны абаттандырылатын болады. Бұл ауылдың келбетін жақсартып қана қоймай, тұрғындар үшін қолайлы қоғамдық кеңістік қалыптастыруға мүмкіндік береді.
Жаңа фельдшерлік-акушерлік пункттің ашылуы Новохайрузовка тұрғындарының сапалы медициналық қызметке қолжетімділігін арттырып, ауылдағы денсаулық сақтау инфрақұрылымын жаңғыртуға бағытталған маңызды қадам болмақ.
