Биыл Шығыс Қазақстанға тартылған инвестиция көлемі 16 пайызға артты. Бұл туралы бүгін Шығыс Қазақстан облысы мәслихатының кезекті 24-ші сессиясында баяндама жасаған облыс әкімі Нұрымбет Сақтағанов айтты, деп хабарлайды F16.kz.
Сессия барысында аймақ басшысы өзіне жүктелген функциялар мен міндеттерді орындауы жөнінде есеп берді. Облыс әкімі өңірдегі инвестициялық ахуалға тоқталып, бұл бағыттағы жеткен жетістіктер жаман емес, дегенмен жұмысты әлі де ширата түсу керектігін айтты.
– Өңір экономикасы қарқынды дамып келеді. Жыл басынан бері облыс экономикасына 542,2 миллиард теңге инвестиция тартылды. Бұл көрсеткіш өткен жылмен салыстырғанда 16 пайызға артты. «Altay Invest-2025» халықаралық форумында 740 миллиард теңгеге 41 меморандумға қол қойылды. 19 мыңнан астам жұмыс орны құрылды, оның ішіндегі 14 мыңы – тұрақты жұмыс орындары, – деді Нұрымбет Сақтағанов.
Белгілі болғандай, биыл облыста 104 миллиард теңгенің 11 инвестициялық жобасын аяқтау жоспарланып отыр.
