Әлеуметтік желілерде Шығыс Қазақстан облысының Марқакөл ауданы полиция бөлімінің бастығы, майор Руслан Сейтқановтың ұсталғаны туралы ақпарат тарады, деп хабарлайды F16.kz.
Белгілі болғандай, оны Ұлттық қауіпсіздік комитетінің жедел қызметкерлері пара алу үстінде қолға түсірген. Ресми расталмаған деректерге сүйенсек, бұл сыйақы заңсыз алтын өндіру мен сатуға «қамқорлық» жасау үшін берілген болуы мүмкін.
ШҚО Полиция департаменті бұл ақпаратқа түсініктеме беруден бас тартты. Ал интернетте республикалық порталдардың бірі жіберген журналистік сауалға ҰҚК-нің ресми жауабы жарияланды. Онда полиция қызметкеріне қатысты тергеудің басталғаны расталғанымен, егжей-тегжейі айтылмаған.
Комитеттегілер Сейтқановқа қатысты қандай бұлтартпау шаралары қолданылғаны және өзге күдіктілердің бар-жоғы туралы да мәлімет бермеді. Сондай-ақ ресми түсініктемелер берілмей тұрып тараған ақпараттың қайдан шыққаны да беймәлім.
