ШҚО-да «Мал ұрысы» іс-шарасының қорытындысы бойынша ондаған заңбұзушылық анықталып, екі мал ұрлығының беті ашылды, деп хабарлайды F16.kz тілшісі Polisia.kz сайтына сілтеме жасап.
17-19 қараша аралығында Шығыс Қазақстан облысының аумағында республикалық «Мал ұрысы» жедел профилактикалық іс-шарасы өткен болатын. Аталған кезеңде полицейлер мал тасымалдау, сату және жаюға қатысты заңбұзушылықтарды анықтау бойынша жұмыстар жүргізді. Рейд қорытындысы бойынша 27 заңбұзушылық фактісі тіркеліп, 57 ауыл шаруашылығы жануарларының иесі мал жаю ережелерін бұзғаны үшін әкімшілік жауапкершілікке тартылды.
– Бұдан басқа, шара барысында бұрын жасалған екі мал ұрлығы дерегі ашылды. Ұлан ауданында еркін жайылымнан 2 бас ірі қара мал ұрланып, келтірілген шығын 2 миллион теңгені құрады. Сондай-ақ, дәл осындай жағдай Глубокое ауданында да болған. Қаскөйлер 1 бас ірі қара мал ұрлаған, қылмыстық әрекеттен келтірілген шығын 600 мың теңгені құраған, – деп хабарлайды дерек көзі.
Полиция мал иелеріне жануарларды дұрыс жаймағаны үшін жауапкершілік қарастырылғанын және осыған ұқсас құқық бұзушылықтардың алдын алу үшін жаю және тасымалдау ережелерін сақтау қажеттігін ескертеді.
