Өскемендегі «Алтай» көтерме-бөлшек сауда орталығы аумағында кезекті ауыл шаруашылығы өнімдерінің жәрмеңкесі өтті. Бұл жолы қала тұрғындары мен қонақтарына Марқакөл ауданының шаруалары тамаша тарту жасады, деп хабарлайды F16.kz.
Жәрмеңкеге келген жұрт арзан бағаға сапалы азық-түлік сатып алып бір қуанса, марқакөлдік өнерпаздардың концертін тамашалап тағы бір мәз-мейрам болды. Одан бөлек гір көтеру, қой көтеру, қол күресі сияқты спорттық ойындарды қызықтап, сынға түскен жігіттерге жанкүйерлік етті.
Бүгін «Туған жер – алтын бесігім» жобасы аясында Марқакөл ауданының жәрмеңкесі болып жатыр. Бұл жерге біздің шаруалар 3 тоннадан астам жылқы етін, 2 тоннадан астам ірі қара етін, 3 тоннадан астам қойдың етін және 100 келіден астам сары май, құрт өнімдерін әкелді. Ауданның бес ауылдық округі қатысып отыр. Жәрмеңке алушыға да, сатушыға да тиімді. Арада делдал жоқ. Шаруалар өзінің табиғи таза, сапалы өнімін тұтынушыға тікелей өткізеді. Сондықтан баға нарықтағыдан төмен, – деді Марқакөл ауданы әкімінің орынбасары Нұрсұлтан Бейсенов.
Таң сәріден сауданың көрігін қыздырған қала тұрғындары түске қарай сәл саябырсып, спорт сайыстарына ден қойды. Алдымен сахнаға білек күшіне сенген жігіттер көтерілді. Гір тасын қолында ойнатқан саңлақтардың алды 24 келілік гірді 60 рет көтерсе, кейінгілері 20-30 ретпен шектеліп жатты. Көптің қызығушылығын туғызған қой көтеру сайысы болды. 40 келіге жуық салмақ тартатын тоқтыны желкесіне қондырып алып екі минут ішінде 50-ден астам мәрте отырып тұрған Сұлтан Амантай бас жүлдені жеңіп алды. Оған өзі көтерген қара тоқты сыйға берілді.
Мұндай сайыстарды өткізіп тұрған дұрыс. Жастардың спортқа деген ынтасы оянып, салуатты өмірге бейімделеді. Былтыр аудандардың жәрмеңкесінде қой көтеру сайысы дәстүрлі түрде өткізіліп тұратын, биыл міне Марқакөл ауданы бастап жатыр. Ары қарай жалғасты болса игі еді. Халықтың көңілін көтеріп, бір серпіліп қалды. Спорт деген жақсы ғой, – деді қой көтеру бәсекесінің жеңімпазы Сұлтан Амантай.
Жәрмеңкеге жиылған көпшілік сауда жасап қана қоймай, концерт пен спорт сайыстарын тамашалап, көтеріңкі көңіл күйде тарқасты.
