ШҚО-да психотроптық заттарды сатумен айналысқан азамат ұсталды. Бұл туралы Polisia.kz сайтына сілтеме жасап F16.kz порталы хабарлайды.
ШҚО Полиция департаменті есірткі қылмысына қарсы іс-қимыл басқармасының қызметкерлері кинологиялық қызмет орталығымен бірлесіп, тыйым салынған интернет-дүкенінің қойма-ораушысы ретінде жұмыс істеген, еліміздің басқа өңірінен келген 26 жастағы азаматты ұстаған. Жедел жүргізілген тінту барысында оның пәтерінен 132,52 грамм α-PVP және 286,48 грамм мефедрон, жалпы салмағы 419 грамм болатын психотроптық заттар тәркіленді.
Сондай-ақ электрондық таразылар, зип-пакеттер және изолента орамасы табылып, айғақ зат ретінде алынды. Қазіргі уақытта күдікті уақытша ұстау изоляторына қамалды. Аталған факті бойынша сотқа дейінгі тергеу басталды.
– Полиция психотроптық заттарды заңсыз сақтау, тарату немесе дайындаумен айналысқан адамдардың заңмен қатаң жазаланатыны туралы ескертеді. Күдік тудыратын кез келген әрекеттер туралы тез арада полицияға хабарлауға шақырады, – деп жазады дерек көзі.
