Шығыс Қазақстан халқына қолайсыздық туғызған уақыт белдеуіне қатысты сұрақ бүгін Өскеменде өткен Орталық коммуникациялар қызметінің көшпелі брифингінде тағы да қойылды, деп хабарлайды F16.kz тілшісі.
Тағы да деп екпін түсіріп отырған себебіміз, уақыт белдеуінің өзгеруіне байланысты мәселе кейінгі кезде қоғамның наразылығын туғызып, әлеуметтік желіде қызу талқыланып жатыр. Бұл тақырыпты отандық БАҚ дүркін-дүркін көтеріп, халықтың үнін жоғарыға жеткізуге тырысып келеді. Көптің көкейіндегі сауалды Press.kz журналисі Жәния Ұранқаева облыс әкімі Ермек Көшербаевқа қойды.
— Неліктен сіз облыс тұрғындарының пікірін ескеріп, уақыт белдеуін өзгертудің тиімсіз екенін жауапты министрлікке жеткізбедіңіз? Бізге, журналистерге тиісті министрлік «уақытты өзгертуге Шығыс Қазақстанның халқы қарсы емес» деп жауап берді. Ал облыстың басшысы ретінде шығыста уақытты жылжытуға болмайтынын неге айтпадыңыз? Неге халықты қолдамадыңыз? – деді Жәния Ұранқаева.
Өңір басшысы бұл мәселеге қатысты деректер тиісті министрлікке жолданғанын айтты.
— Үкімет берген тапсырманы орындау мемлекеттік қызметші ретіндегі міндетіміз. Халықтың арызы мен пікірі тиісті инстанцияға жеткізілді. Оның ішінде тұрғындардың тез қараңғы түсетіндіктен ештеңеге үлгермейтіні, баланы балабақшадан жай алатыны, денсаулық жағдайына алаңдауы, жұмыстан жай шығатыны бәрі ескерілді. Әлеуметтік желідегі ақпарат түгел жинақталып, министрлікке жолданды. Ендігі мәселені министрліктен сұраңыздар, – деді Ермек Көшербаев.
Фото: t.me/shko_resmi
