Глубокое ауданы Уварово ауылының халқы көп жыл бойы сапалы медициналық көмекке толық қол жеткізе алмай келді. Өйткені 1999 жылы фельдшерлік-акушерлік пунктте болған өрттен кейін медицина қызметкерлері жалға алған ғимаратта жұмыс істеуге мәжбүр болды. Онда толыққанды қызмет көрсетуге қажетті жағдай жоқ еді. Тіпті әкімдік ғимаратында да уақытша отырды. Былтыр жаңа медицина мекемесі іске қосылып, дәрігерлер мен ауыл тұрғындарының тынысы ашылды, деп хабарлайды F16.kz.
2023 жылы ауданда салынатын медицина нысандарының тізімі бекітіліп, оған Уварово ауылындағы фельдшерлік-акушерлік пункт те енгізілді. Ол «Ауылдық денсаулық сақтауды жаңғырту» ұлттық бағдарламасы аясында бой көтерген алтыншы медицина нысаны болды.
2025 жылы жаңа ФАП пайдалануға беріліп, тиісті лицензия алынды. Осылайша, ауыл тұрғындары ресми әрі лицензиясы бар медициналық көмек алу мүмкіндігіне ие болды. Қазір мұнда 1100 адам тіркелген. Олардың ішінде бір жасқа дейінгі 15 бала, 10 мүгедектігі бар азамат және тоғыз жүкті әйел бар. Сонымен қатар қант диабетімен ауыратын 46 науқас және артериялық гипертензиясы бар 155 адам есепте тұр, – деді Гглубокое аудандық ауруханасының бас дәрігері Мирхат Увазыров.
Амбулаторияда барлығы жеті кабинет жұмыс істейді. Олардың қатарында балаларды қабылдау кабинеті, ересектерге арналған қабылдау бөлмесі, физиотерапия кабинеті, акушер кабинеті, дәріхана, егу және процедуралық кабинеттер бар. Бұдан бөлек, туберкулезге күдік болған жағдайда қақырық тапсыруға арналған арнайы жабдықталған бөлме қарастырылған.
Бұл бөлмеде науқастардың қауіпсіздігін қамтамасыз ету шарасы жүргізіледі. Пациент қақырық тапсырғаннан кейін автоматты түрде желдету жүйесі қосылып, бактерицидті шам жұмыс істейді. Мұның бәрі басқа келушілерді қорғауға мүмкіндік береді, – деп түсіндірді Мирхат Увазыров.
Жаңа фельдшерлік-акушерлік пункттің жұмысына ауыл тұрғындары да, медицина қызметкерлері де дән риза.
Бұрын бір кабинетте балалармен бірге ересектерді де қабылдауға тура келген. Қазір заманауи құрал-жабдықтармен жабдықталған, әртүрлі жағдайдағы науқастарға арналған жеке кабинеттер бар. Бұл өзгерістер медициналық қызметтің сапасын айтарлықтай жақсартты, – деді медицина қызметкері Галина Мелентьева.
Сонымен қатар фельдшерлік-акушерлік пункт жанынан ақылы дәріхана ашылып, ауыл тұрғындарының қажетті дәрі-дәрмекке қол жеткізу мүмкіндігі артты.
