ШҚО-да құрылыс компаниясының топ-менеджерлері көппәтерлі тұрғын үй кешенін саламыз жеген желеумен 1,8 млрд теңге қаржы жымқырған. Қаржылық мониторинг агенттігінің Шығыс Қазақстан облысы бойынша департаменті бұлардың әрекетіне тосқауыл қойды.
Ресми ақпаратқа сүйенсек, Өскемен қаласында екі күдікті 102 адамды алдап, тұрғын үй құрылысына үлескер ретінде қатысуға жалған келісімшарттар жасаған. Алайда құрылыс нысаны уақытылы аяқталмаған. Жұмыстардың мерзімі бірнеше мәрте ұзартылып, көппәтерлі тұрғын үй кешенінің құрылысы аяқсыз қалады.
Сонымен қатар компанияда үлескерлердің қаражатын тартуға қажетті рұқсат құжаттары болмағаны да анықталып отыр.
Қылмыстық процестік кодекстің 201-бабына сәйкес тергеудің басқа мәліметтері жария етілмеді.
Фото: stat.gov.kz
