Өскеменнің Күленов кентінде ерекше Наурыз өтті. Ерекшелігі сол, Ұлыстың ұлы мейрамын Әлия Молдағұлова көшесінің тұрғындары бір кісідей жұмылып, жоғары деңгейде ұйымдастырды, деп хабарлайды F16.kz.
Шығыстың бас шаһарында Наурыз мейрамы референдумнан кейін бірден басталып кетті. Наурызнама онкүндігі аясында қаланың әр ауданында күн сайын көктем мерекесі тойланып, тұрғындарға тамаша көңіл-күй сыйлады. Ал 22 наурызда Республика алаңында негізгі мерекелік шара өтті. Бұл күні 5 мыңнан астам адам домбырамен «Ақбұлақ» әнін шырқап, дүниежүзілік рекорд жазды.
Облыс орталығындағы салтанатты жиын Әлия Молдағұлова көшесінде жалғасын тапты. Жергілікті тұрғындардың ауызбіршілігі мен ынтымағының арқасында биыл үшінші жыл қатарынан өткізіліп отырған Наурыз мейрамына қала әкімінің орынбасары Болатбек Мамарбаев қатысты.
Биыл қаламызда әз-Наурыз ерекше өтіп жатыр. Сіздер де осындай Ұлыстың ұлы күнінде үшінші жыл қатарынан жиылып, береке-бірліктеріңізді көрсетіп, жастарға үлгі болып жатырсыздар. Бұны қаланың дамуына қосып жатқан үлестеріңіз деп білемін. Күні кеше Өскеменде рекорд жазылғанына куә болдыңыздар және оған өздеріңіз де атсалыстыңыздар. Бүгінгі Наурыз тойы құтты болсын. Қазіргідей аласапыран заманда еліміз тыныш, жұртымыз аман болсын. Балаларымыз бақытты, қарияларымыз аман болсын! Баршаңызда ұлық мерекемен құттықтаймын, – деді Болатбек Мамарбаев.
Молдағұлова көшесінің тұрғыны, ардагерлер бастаушы ұйымының төрағасы Сабыр Оспанов мерекені өткізуге жергілікті жұртшылық ұйытқы болып, әр шаңырақ ақша жинағанын атап өтті.
Бабаларымыз ғасырлар бойы тойлап келген мерекені осы көше тұрғындары биыл үшінші жыл атап өтіп жатырмыз. Тұрғындар шамасы келгенше ақша жинады. Киіз үй құрып, дастархан жайдық. Мұндағы мақсатымыз – қазақтың салт-дәстүрін дәріптеу, ұлттық құндылықтарымызды насихаттау, жастарға үлгі-өнеге көрсету. Қазір бір жаманы, қалада тұрғындар көршісін танымайды, бір-бірімен араласпайды. Олай болмау керек. Қазақта «көршіні құдай қосады» деген сөз бар. Осындай шаралар арқылы біз адамдардың береке-бірлігін арттырып, ынтамақты дәріптеуге тырыстық, – деді Сабыр Оспанов.
Мереке күні осы маңдағы алаңқайда сахна орнатылып, киіз үйлер тігілді. Қазан көтеріп, сарқылдатып самауыр қайнатты. Қонақтар мен тұрғындар ұлттық тағамдарға толы дастарханнан дәм татып, наурызкөже ішіп, бір-бірін құттықтап мәз болды. Өскемендік өнерпаздармен бірге Молдағұлованың тұрғындары да сахнаға шығып, ән салды, би биледі. Ақсақалдар бата беріп жарысты, жастар гір көтерді, қол күрестірді. Қой көтеру сайысына тек көше тұрғындары қатысты. Сайысқа түскендердің алды 40 келілік қапты 60 рет көтеріп, бәйгеге тіккен қойды жеңіп алды.
