«Қазақстан балалары» тұжырымдамасы шеңберінде Терезе-SAFE атты жаңа ақпараттық бастама қолға алынды. Бұл туралы Оқу-ағарту министрлігінің баспасөз қызметі мәлімдеді, деп хабарлайды F16.kz.
Министрлік мәліметінше, науқанның басты мақсаты — тұрмыстық жазатайым оқиғалардың алдын алу және кішкентай балалардың терезеден құлап кету қаупін азайту.
Статистикалық деректерге сәйкес, 2025 жылдың қорытындысында мұндай оқиғалар саны 2023 жылмен салыстырғанда 1,8 есеге көбейген. Әсіресе, 2–5 жас аралығындағы балалар арасында қауіпті жағдай көп болған.
Жоба аясында «Қауіпсіздік минуты» қағидаты енгізілмек. Бұл — ата-аналардың күнделікті тұрмыста үй ішін тексеріп отыру дағдысын қалыптастыруға бағытталған. Атап айтқанда, терезе бекіткіштерінің сенімділігіне назар аударып, терезе маңында баланың шығуына мүмкіндік беретін жиһаздың болмауын қадағалау ұсынылады. Басты міндет — ата-аналардың қауіпсіздік мәдениетін арттыру.
Науқан шеңберінде өңірлерде бірқатар іс-шарал жоспарланған. Атап айтсақ:
Білім беру бағытында мектептер мен балабақшаларда «Қауіпсіз үй» тақырыбында арнайы сабақ өткізіліп, мамандардың қатысуымен ата-аналар жиналысы ұйымдастырылады.
Тұрғын үй секторында үй басқару ұйымдары мен белсенді тұрғындар бірлесіп, терезелерге қорғаныс құлыптарын орнату және қауіпсіздік ережелері жазылған жадынамалар тарату шараларын жүргізеді.
Денсаулық сақтау саласында жаңа туған сәбилерді патронаждық бақылау кезінде медицина қызметкерлері үйлерде шағын қауіпсіздік тексерісін өткізіп, ата-аналарға нақты ұсыныстар береді.
Бұл бастама мемлекеттік органдар, үкіметтік емес ұйымдар, қоғам белсенділері мен бұқаралық ақпарат құралдарының бірлескен жұмысы арқылы жүзеге асырылады.
Мамандардың айтуынша, мұндай кешенді шаралар ата-аналардың жауапкершілігін арттырып қана қоймай, әрбір үйде қауіпсіз орта қалыптастыруға ықпал етеді. Нәтижесінде, ел бойынша балалар қауіпсіздігіне қатысты бірыңғай талаптар орнығып, жарақаттану деңгейін жүйелі түрде төмендетуге мүмкіндік туады.
