Өскеменде мектеп оқушылары мен студенттерге арналған «Мен – кәсіпкермін» республикалық байқауының финалдық кезеңі өтті. Биыл тоғызыншы рет ұйымдастырылған жоба Шығыс Қазақстан облысында кәсіпкерлікке қызығушылық танытқан жастарды біріктіріп, олардың бизнес-идеяларын нақты жобаларға айналдыруға мүмкіндік берді, деп хабарлайды F16.kz.
Бұл бастама алғаш рет Шығыста қолға алынған. Бүгінде жоба республикалық деңгейге шығып, үшінші жыл қатарынан Оқу-ағарту министрлігінің қолдауымен жүзеге асырылып келеді. Байқаудың негізгі мақсаты – жастар арасында кәсіпкерлік ойлауды дамыту және бизнес жүргізудің практикалық дағдыларын қалыптастыру.
Биылғы байқаудың бір ерекшелігі бизнес қауымдастықтың белсенді қатысуы болды. Кәсіпкерлер қазылар алқасының мүшелері және сарапшылар ретінде қатысып, үміткерлердің жобасын бағалап қана қоймай, оларды жетілдіруге бағыт-бағдар берді. Мұндай тәжірибе қатысушыларға нарық талаптарын тереңірек түсінуге мүмкіндік берді.
Байқау бірнеше кезеңнен тұрды. Алдымен оқу орындарында іріктеу жүргізіліп, үздік жобалар сарапталып, бағаланды. Нәтижесінде 19 колледж бен 12 мектептен 83 өтінім қабылданып, жалпы саны 128 қатысушы финалға жолдама алды. Финал Қазақстан-Американ еркін университетінде ашық қорғау форматында өтті.
Қатысушылар жобаларын қазіргі экономиканың негізгі бағыттары бойынша ұсынды. Олардың қатарында әлеуметтік кәсіпкерлік, цифрлық технологиялар, туризм, медицина, креативті индустрия және агроөнеркәсіп салалары бар. Жастар ұсынған бастамалар мазмұны мен дайындық деңгейі жағынан жоғары бағаланды.
Стартаптар қатарында қызмет көрсету саласындағы жобалар, қалдықтарды қайта өңдеу, білім беру платформалары, цифрландыру шешімдері және жергілікті ресурстарға негізделген шағын өндіріс бастамалары бар. Қатысушылар тек креативті идеялар ұсынып қана қоймай, бизнес-модель құру, тәуекелдерді бағалау және даму перспективаларын айқындау бойынша білімдерін көрсетті.
ШҚО Кәсіпкерлер палатасы адами капиталды дамыту бөлімінің басшысы Әсет Әділханның айтуынша, ұсынылған жобалардың басым бөлігі – іске асыруға дайын нақты бизнес-идеялар.
Қатысушылардың дайындық деңгейі жоғары. Егер тиісті қолдау көрсетілсе мұндағы көп жоба жүзеге асыруға дайын. Ең бастысы бұл үдеріске бизнес белсенді қатысып отыр. Бұл жастарға сарапшылардың нақты бағасын алып, нарық талаптарын түсінуге мүмкіндік береді, – деді ол.
Байқауды ШҚО білім басқармасы, «Атамекен» кәсіпкерлер палатасы, Қазақстан-Американ еркін университеті және Өскемен экономика және техника колледжі бірлесіп ұйымдастырды.
Нәтижесінде әр бағытта үздік жобалар анықталды. Жеңімпаздар енді республикалық кезеңде облыс намысын қорғайды. Бұған дейін Шығыс Қазақстан өкілдері екі жыл қатарынан жақсы нәтиже көрсеткен. Айталық, 2024 жылы бір екінші орын, 2025 жылы екі үшінші орын иеленген.
