Өскемен қаласының сол жағалау бөлігінде жаңа мектептер мен балабақшалар бой көтереді, деп хабарлайды F16.kz.
Бұл жақтағы аудандарда халық саны жыл санап артып келеді. Яғни жаңа білім нысандары да қажет. Облыстық білім басқармасының өкілдері білім беру инфрақұрылымын дамыту жоспарлары жөнінде айтты.
Ведомство өкілдері мемлекеттік-жекешелік әріптестік (МЖӘ) шеңберінде сол жағалауда төрт балабақша салу бойынша инвестициялық ұсыныс әзірленгенін хабарлады. Үш балабақша 240 орынға, біреуі 320 орынға шақталған. Жоспар бойынша бұл нысандар Оралхан Бөкей көшесінде, Есенберлин және Сәтбаев даңғылдарында орналасады.
Балабақшаларды салуға арналған жер учаскелерінің кадастрлық паспорттар дайындалып, меншік құқығы тіркелген.
«МЖӘ шеңберінде мектепке дейінгі балалар мекемелерін салу нақты нысаналы нұсқауларды және екі кезеңдік конкурсты өткізудің белгіленген мерзімдерін бекітуді қамтитын регламентті қатаң сақтауды талап етеді. Конкурстық рәсімдердің нормативтік ұзақтығын, шарттар жасасу кезеңін және одан кейінгі құрылыс-монтаждау жұмыстарын ескерсек, бұл жоба алдағы үш жыл көлемінде жүзеге асуы тиіс», — деп мәлімдеді бейінді басқарма.
Сондай-ақ дәл осы аудандарда бірнеше мектеп салу жоспарда бар. Атап айтқанда:
- «Спорт кешендері» ауданында 600 орындық мектеп;
- 21-ші шағын ауданда 600 орындық мектеп;
- 23-ші шағын ауданда 300 орындық мектеп;
- 26-шы шағын ауданда 1200 орындық мектеп;
- 26-шы шағын аудандағы мамандандырылған ХҚКО жақта 1200 орындық мектеп салынады.
Сонымен қатар 20-шы шағын ауданда «Дарынды балаларға арналған облыстық мамандандырылған мектеп-лицей-интернаты» салынуы тиіс. Мектеп 580 орынға, интернат 300 орынға шақталады.
Ал 22-ші шағын ауданда «Білім-инновация» мамандандырылған лицейінің қыздарға арналған 600 орындық және ұлдарға арналған 600 орындық корпусы бойы көтереді. 400 орындық екі жатақхана-интернаты және салынады.
19-шы шағын аудандағы бұрынғы көпсалалы колледж ғимараттын 1000 орындық мектеп ретінде қайта жаңғырту жоспары да бар.
Бұл жобалардың нақты мерзімі бейінді басқарма ұсынған ақпаратта көрсетілмеген.




