Шығыс Қазақстан облысында күн райына байланысты мектептерде сабақты тоқтату тәртібі жөнінде айтылды. Оқу процесіне қатысты шешім ауа температурасына ғана емес, желдің жылдамдығына да байланысты болады, деп хабарлайды F16.kz.
Қандай жағдайда сабақ тоқтатылуы мүмкін?
Желдің жылдамдығы секундына 2 метрден төмен болса:
1-4 сыныптар – ауа температурасы -28 °C және одан төмен болғанда;
5-9 сыныптар – -32 °C және одан төмен болғанда;
10-11 сыныптар мен колледждердің I-II курс студенттері – -34 °C және одан төмен болғанда.
Желдің жылдамдығы секундына 2 метрден жоғары болса:
1-4 сыныптар – -23 °C және одан төмен болғанда;
5-9 сыныптар – -27 °C және одан төмен болғанда;
10-11 сыныптар мен колледждердің I-II курс студенттері – -29 °C және одан төмен болғанда.
Ауа температурасы -17°C және одан төмен болған жағдайда мектеп оқушылары мен колледж студенттеріне сыртта сабақ өткізуге рұқсат етілмейді.
Сабақтың тоқтатылғаны туралы хабарлама қашан беріледі?
Бірінші ауысым бойынша:
Білім басқармасына ақпарат беру – сағат 06:00–07:00 аралығында;
ата-аналар мен оқушыларды хабардар ету – сағат 06:45–08:00 аралығында.
Екінші ауысым бойынша:
Ақпарат беру – сағат 10:30–12:00 аралығында;
ата-аналар мен оқушыларды хабардар ету – сағат 11:15–13:00 аралығында.
Үшінші ауысымдағы оқушыларды хабардар ету де сағат 11:15–13:00 аралығында жүргізіледі.
Сабақты тоқтату туралы шешімді кім қабылдайды?
Сабақты тоқтату және қашықтан оқыту форматына көшу туралы шешім білім беру ұйымы басшысының жеке бұйрығымен рәсімделеді. Онда сабақ тоқтатылатын сыныптар мен топтар, оқу орнының жұмыс тәртібі және ақпараттандыруға жауапты тұлғалар көрсетіледі.
Ата-аналар мен оқушыларға ақпарат мектептер, колледждер және облыстық Білім басқармасы мен білім беру ұйымдарының әлеуметтік желілердегі ресми парақшалары арқылы жеткізіледі.
Ата-аналарға күн райы күрт суытқан кезде оқу орындары мен Білім басқармасының ресми хабарламаларын қадағалап отыру ұсынылады. Себебі сабақтың тоқтатылуы туралы шешім тек ауа температурасына қарап емес, белгіленген талаптар негізінде қабылданады.




