Өскемен тұрғындары қаладағы қоғамдық көліктердің ескіргенін айтып шағымданғанына біраз жыл болды. Бұл мәселе әсіресе әлеуметтік желілерде дүркін-дүркін көтеріліп, қызу талқыланып жүр. Облыс орталығында күні кеше болған оқыс оқиға қоғамдық көліктерді жаңарту кезек күттірмес міндеттердің бірі екеніне тағы бір мәрте көз жеткізді, деп хабарлайды F16.kz.
Айта кетейік, бүгін «Халық банк» аялдамасына келіп тоқтаған №25 автобуста жазатайым оқиға болып, бір адам зардап шекті. Куәгерлердің айтуынша, автобус есігінің жанында бір зат жарылып, жарықшағы аялдамада тұрған әйелдің басына тиген.
Әлеуметтік желіде шағымдарын жарыса жазған халық бұл бағыттағы қоғамдық көлік мәселесі шешімін таппай келе жатқанына көп жыл болғанын айтты. Әсіресе, жаз мезгілінде автобусты сағаттап күтуге тура келеді. Сирек жүргеннен кейін жолаушылар да адамға лық толы қоғамдық көлікке сыймай жатады.
Қала әкімі Алмат Ақышов аталған мәселені бақылауға алатынын айтты.
Айта кетейік, биыл қалаға жаңадан 40 автобус алу жоспарланып отыр.
Фото: видеодан алынған кадр
