Биылдан бастап елімізде арнаулы әлеуметтік қызмет көрсететін ұйымдарды міндетті түрде лицензиялау енгізілді. Бұл жаңалық халықты әлеуметтік қорғау жүйесін жаңғырту аясында жаңа Әлеуметтік кодекс нормаларын іске асырудың бір бөлігі болды, деп хабарлайды F16.kz.
Бұл туралы Шығыс Қазақстан облыстық жұмыспен қамту және әлеуметтік бағдарламаларды үйлестіру басқармасы басшысының орынбасары Динара Қожанова өңірлік коммуникациялар қызметі алаңында өткен брифингте мәлім етті.
Меншік нысанына қарамастан барлық мекемелер лицензиялаудан өтеді. Шығыс Қазақстанда мұндай ұйымдар саны – 36, оның ішінде тоғызы – үкіметтік емес, 27-cі – мемлекеттік мекеме. Бұл орталықтар халықтың әртүрлі санатына қызмет көрсетеді. Атап айтсақ, қарт адамдарға, мүгедектігі бар жандарға, ерекше қажеттілігі бар балаларға және өмірлік қиын жағдайға тап болған азаматтарға қызмет етеді. Былтыр тек аумақтық орталықтар арқылы 5800-ден астам адам көмек алған, оның ішінде 418-і – ерекше бала.
Сонымен қатар бұрынғы жалпы тарифтің орнына жан басына шаққандағы қаржыландыру жүйесі енгізілді. Мамандардың айтуынша, нормативтерді есептеу әдістемесі әзірленіп, қызмет көрсету сапасын мониторингілеу жүйесі дайындалған, ал орталықтардың өзі жаңа қаржыландыру жағдайларына бейімделу кезеңінен өтіп жатыр.
Мұндай шаралар көрсетілетін қызметтердің сапасын арттыруға, бюджеттік шығындардың ашықтығын қамтамасыз етуге және әлеуметтік қолдау жүйесін азаматтардың нақты қажеттіліктеріне көбірек бейімдеуге мүмкіндік береді.
Фото: ШҚО өңірлік коммуникациялар қызметі
