Бүгін Өскеменде «Алтайдан Оралға дейін» республикалық велошеруінің жалауы желбіреді. Еліміздің шығысынан батысына дейін велосипедпен жүріп өтуді мұрат тұтқан шабандоздар сапарын облыс орталығындағы тәуелсіздік монументінен бастады, деп хабарлайды F16.kz.
Велошеру Жұмысшы мамандықтар жылы аясында ұйымдастырылғанын атап өткен абзал. Салтанатты шараға Шығыс Қазақстан облысы әкімінің орынбасары Ербол Нұрғалиев, спорт қауымдастығының өкілдері, колледж оқытушылары мен студенттері қатысты.
Бұл сапарға 236 қатысушы аттанды, оларға қаладағы техникалық және кәсіптік білім беру мекемелерінің 200-ден астам студенті қосылды. Ауқымды шараның мақсаты — жұмысшы мамандықтарын насихаттау, еңбекке деген құрметті қалыптастыру және жастар арасында салауатты өмір салтын ұстану қағидаттарын ілгерілету.
Велошеру бағыты Қазақстанның сегіз өңірін қамтиды: Шығыс Қазақстан, Абай, Павлодар, Ақмола, Қостанай, Ақтөбе, Батыс Қазақстан облыстары мен Астана қаласы. Велошабандоздар мәреге 8 маусым күні жетуді жоспарлап отыр.
Фото: ШҚО өңірлік коммуникациялар қызметі
