Өскемендіктердің сүйікті демалыс орнына айналған «Металлург» саябағында аттракциондардың бағасы арзандады, деп хабарлайды F16.kz тілшісі.
Бұған дейін әлеуметтік желіде тұрғындар аттракциондардың бағасы тым қымбаттағанын айтып шағымдана бастады. Демалыс орнының жұмыс барысымен танысып, жалға алушылармен кездескен қала әкімі Алмат Ақышов бағаны қайта қарап, мүмкіндігінше төмендетуді немесе саябаққа ортақ бірыңғай билет енгізу мүмкіндігін қарастыруды тапсырған.
Жалға алушылармен жиналыс өткізіп, бағаны мүмкіндігінше арзандатуға тырыстық.Тұрғындардың шағымы мен қала әкімінің ұсынысынан нәтиже шығып, кейбір аттракциондарда баға 500, 300, 200 теңгеге дейін төмендеді. Саябақ келушілерді қуантуға әрдайым дайын және біздің тарапымыздан көрсетілетін қызметтің сапасы мен қауіпсіздігін үнемі бақылап отыруға уәде береміз, — деді жалға алушы Александр Измайлов.
Саябақ басшылығының айтуынша, аттракциондардың техникалық қауіпсіздігін қамтамасыз ету, жөндеу, еңбекақы төлеу, салықтар және басқа да міндетті шығындарға байланысты бәрінде бірдей бағаны төмендету мүмкін емес.
