1 маусым – Балаларды қорғау күні Өскеменде бірқатар мерекелік шара өтеді, деп хабарлайды F16.kz.
«Қазақстан балалары» атты мерекелік бағдарлама аясында концерт, фестиваль, байқаулар мен түрлі ойындар ұйымдастырылады.
Күндізгі сағат 10.00-ден 13.00-ге дейін Республика алаңы мен Солжағалау кешенінде балдырғандарға арналған концерт пен ойын—сауық жоспарланған. Сондай—ақ этносаябақта PlayArena арнайы ойын аймағы жұмыс істеп тұрады бұл күні.
Шығыс Қазақстан облысы білім бақсармасының мұрындық болуымен «7 КЕРЕМЕТ» балалар фестивалі де осы солжағалау кешенінде өтеді. Саябақ аумағында жеті тақырыптық алаң ұйымдастырылады. Көпшілік жұрт қызықты әрі танымдық ойындарды, спорттық сайыстар мен шеберлік сағаттарын тамашалайды. Отбасыларға арналған көңілді квест ойыны да қарастырылған. Ертек пен мультфильм кейіпкерлері де мерекелік шараның көрігін қыздырып, балақайларды қуантуға асығады.
Осы күні 11.00-де Арбатта балаларға арналған жалпықалалық мереке басталады.
Шығыс Қазақстан облыстық филармониясы мен «Мечтатели» балалар клубы қала тұрғындары мен қонақтарын естен кетпес ерекше мерекеге шақырады. Онда театрландырылған қойылым, викторина, шахмат «аукцион», экспресс шеберлік сағаты, сурет салу байқауы және басқа да көңілді ойындар өткізу көзделген.
Фото: visiteast.kz
