Өскеменнің Самал саябағында құтқарушылар балаларға арнап акция өткізді. «Балалар қауіпсіздігі – басты назарда» деп аталған шара 1 маусым – Балаларды қорғау күніне орай ұйымдастырылды, деп хабарлайды F16.kz.
Іс-шара барысында балалар судан өту, зардап шеккен адамға алғашқы көмек көрсету, өрт сөндіру сияқты тапсырмаларды орындады, құтқарушылардың сенімді серігіне айналған ізшіл итпен танысты. Төтенше жағдай қызметінің қыр-сырына қаныққан балалар көрген—түйгені туралы әңгімелеп берді.
Қаладағы №20 мектеп оқушысы Ақмаржан Нұрболқызы: — Біз қауіпсіздік ережелерін сақтау қажеттігін түсіндік. Қиындықтарды қалай жеңуге болатынын және зардап шеккен адамға алғашқы көмек көрсетуді үйрендік, – десе, «Үміт» балалар үйінің тәрбиеленушісі Максим Орлов: «Қауіпсіздік акциясына қатысқаныма өте қуаныштымын. Кедергілер жолағынан өтіп, төтенше жағдайда қалай әрекет ету керектігін үйрендім», – деді.
Айта кету керек, акцияны өткізуге Қазақстан Қызыл жарты ай қоғамы ШҚО филиалының еріктілері атсалысты.
ШҚО ТЖД баспасөз қызметі
Фото: ШҚО ТЖД баспасөз қызметі
