Қазақстан Республикасының Премьер-министрі Олжас Бектеновтың төрағалығымен өткен Үкімет отырысында елімізге келген туристердің жайлы және қауіпсіз демалуын қамтамасыз ету мәселесі қаралған болатын, деп хабарлайды F16.kz.
Үкімет отырысының қорытындысы бойынша Премьер-министр туристердің қауіпсіздігін күшейту бойынша бірқатар тапсырма берді.
Осыған орай, облыс әкімі Нұрымбет Сақтағанов өңірдегі салалық мекемелердің басшыларымен кездесіп, оларға тиісті міндеттер жүктеді.
– Шығыс Қазақстанда туристердің қауіпсіз демалуын қамтамасыз ету үшін кешенді шаралар қабылданды. Демалыс аймақтарында отандық және шетелдік туристер үшін жайлы әрі қауіпсіз жағдай жасау қажет. Қауіпсіздік мәселесі тұрақты бақылауда, – деді облыс әкімі.
Осыған орай, ШҚО Полиция департаменті қоғам белсенділері және еріктілермен бірлесіп, туристік аймақтарда полиция жасағының тұрақты қатысуын қамтамасыз ететін патрульдік бағыттарды әзірлегенін айту керек.
Сонымен қатар, құрамында патрульдік полиция қызметкерлері, учаскелік инспекторлар және облыстық Төтенше жағдайлар департаментінің мамандары бар мобильді топтармен рейдтік іс-шаралар жүргізілетін болады. Бұл топтар әкімшілік заңнаманың орындалуын, судағы қауіпсіздік ережелері мен санитарлық нормалардың сақталуын қадағалайды. Демалыс және мереке күндері олардың жұмысы күшейтіледі.
– Сондай-ақ, барлық патрульдік автокөлік қажетті құтқару құралдарымен жабдықталған, – деп хабарлайды облыс әкімінің баспасөз қызметінен.
