Шығыс Қазақстан облысының Сібе көлдеріне ағылған туристер легі жылдан-жылға арта түскен. Жиыны 200-ден астам демалушыға шақталған Шалқар көлінің муниципалды жағажайында демалыс күндері адам қарасы мыңға жетіп жығылады, деп хабарлайды F16.kz.
Жағажай директоры Мадина Болатқызы кісі аяғы көбейсе барлық жерде ұзын-сонар кезек басталатынын айтады.
Кейінгі уақытта сенбі, жексенбіде мұнда келетін туристер саны мыңға таяп жүр. Ал бұл жағажай 100-150 адамға ғана арналған. Яғни он есе артық жүктемемен істеп тұр. Демалушылар көбейсе дәмханада, киініп шешінетін кабиналарда, тіпті әжетханаға дейін кезек болады. Жағалаудан ине шаншыр орын таппайсыз. Әлеуметтік желіде халық шағымданып жатыр. Жуықта облыс әкімінің бірінші орынбасары келіп, жағдайды көрді, мәселені шешу жолдарын қарастырды. Енді жаңадан жоба жасалып, жағажайды кеңейту қолға алынады, – деді ол.
Муниципалдық жағажай директорының айтуынша, жаңа жобаны жүзеге асыруға барлық мүмкіндік бар. Қазірдің өзінде жеке кәсіпкерлер жағажайдан арнайы орын алып, этноауыл тұрғызып, киіз үйлерді қаз-қатар тізіп қойған. Жағалауға құм төгіліп, абаттандыру жұмысы жүргізілген. Демалушылардан кейін қалатын қалдықтар уақтылы шығарылады. Көлденең жатқан қоқыс көзге шалынбайды. Туристер дән риза. Көрші Қарағанды облысынан келген Әсет Әмірбеков Сібе көлінің жағасына алғаш рет табаны тиіп тұрғанын айтты.
Отбасыммен Қарағандыдан келдім. Зайсанға күйеу баламын. Сібе көлдерін бірінші рет көріп тұрмын. Табиғаты керемет екен және Өскеменнің іргесінде. Жалпы, қазақ даласының қай пұшпағы да ғажап қой, соны бағалап, өзіміздің өлкеде демалу керек. Өзіме бұл жер ұнады, жыл сайын келемін енді, – деді қарағандылық мейман.
Шалқар жалғыз болғанмен жағажай бірнешеу мұнда. Муниципалды жағажайдан бөлек, адамдар суға шомылып, демалатын тағы да бірнеше орын бар. Өкініштісі бұл жағалаулардың жағдайы көңіл көншітпейді. Әлеуметтік желіге бейнежазба салып, шағым айтатындардың дені осы жақтан табылады.
Биыл екінші рет келіп тұрмын. Қонақтарды әкелдім. Былтыр көлікпен кіргенге 1 мың теңге алатын, жаңа 2 мың теңге төледім. Қымбаттатып жіберіпті. Бірақ ешқандай жағдай жоқ. Қоқыс төгетін бір жәшік қойған. Ол жеткіліксіз, жылдам толып қалады. Аузы-мұрнынан шығып, мүңкіген иісі мұрныңды жарады. Ал дәретханасын айтпай-ақ қойдым. Есігі жабылмайды, іші былыққан. Қысқасы, жағдай жасалмаған. Ақша алған соң дұрыстап қойса болады ғой, – деді өскемендік Досымбек Әлтайырұлы.
Бұл жағажайда бірнеше шатыр қойылған екен, бірақ ақылы. Бір шатырды жалға алу бағасы – 10 мың теңге. Ал муниципалды жағалауда шатырды тегін алуға болады.
Бір көл, екі түрлі жағажай. Бір қызығы демалушылардың дені муниципалды жағажайда бәрі тегін әрі жайлы екенін білмейтін сияқты. Сондықтан да болар біраз жұрттың қиыр жайлап, шет қонып жүргені…
