Биылғы алты айдың қорытындысы бойынша Қазақстанда мал басының өсімі байқалады. Бұл агроөнеркәсіп кешенінің тұрақты жұмысын және саланың өнімділігінің артуын көрсетеді, деп хабарлайды F16.kz тілшісі Ауыл шаруашылығы министрлігіне сілтеме жасап.
– Ірі қара мал саны 8,8 миллион басқа жетті (+8,3%), соның ішінде сиыр – 4,5 миллион (+16,3%). 2,7 миллион бұзау алынды, бұл өткен жылмен салыстырғанда 17,5%-ға көп. Ұсақ мал басы 0,8%-ға өсіп, 21,5 миллион басты құрады, 7,6 миллион қозы алынды (+4,8%). Жылқы саны 4,7%-ға артып, 4,7 миллион басқа жетті, 1 миллион құлын алынды (+8,1%), – деп жазады министрліктің баспасөз қызметі.
Айта кетейік, биылғы қаңтар-маусым айлары аралығында елімізде 529,9 мың тонна ет өндірілсе (+1,5%), оның 182,3 мың тоннасы – сиыр, 56,4 мың тоннасы – қой және 69,3 мың тоннасы жылқы еті болыпты.
Елімізде ішкі нарықты қорғау мақсатында тірі малды әкетуге уақытша шектеулер енгізіліп, ет өнімдерін экспорттауға бақылау шаралары күшейтілді. Атап айтқанда, 10 қазанға дейін ірі қара мен ұсақ малдың аналығын әкетуге тыйым салынған. Сондай-ақ, 15 мамырдан 30 қазанға дейін бұқаларды экспорттауға рұқсат жоқ.
