Қазақстандықтарға жылу төлемдері бойынша 1,5 миллиард теңгеден астам қаражат қайтарылады, деп хабарлайды F16.kz Ұлттық экономика министрлігінің Табиғи монополияларды реттеу комитетіне сілтеме жасап.
Елімізде есептегіш құралдары орнатылмаған тұтынушылар үшін аталған қызмет түрінің құнына қайта есептеу жүргізілген. Нәтижесінде, қосылған құн салығын ескере отырып, азаматтарға 1,5 миллиард теңгеден астам сома қайтарылатыны белгілі болды.
Қаражат жеке шоттарда бөлек жолмен, аванстық төлем (сальдо) ретінде көрсетіліп, жаңа жылыту маусымы ішінде немесе 2025 жылдың соңына дейін қайтарылатын болады.
Қаражат қайтару елдің түгелдей дерлік өңірін қамтиды. Атап айтқанда:
- Астана қаласы – 224,5 миллион теңге;
- Алматы қаласы – 74,2 миллион теңге;
- Қарағанды облысы – 457 миллион теңге;
- Шығыс Қазақстан облысы – 257,2 миллион теңге;
- Маңғыстау облысы – 176,7 миллион теңге;
- Қостанай облысы – 106,9 миллион теңге;
- Солтүстік Қазақстан облысы – 74,8 миллион теңге;
- Ақмола облысы – 44,3 миллион теңге;
- Павлодар облысы – 34,8 миллион теңге;
- Қызылорда облысы – 23,9 миллион теңге;
- Ақтөбе облысы – 24,1 миллион теңге;
- Жамбыл облысы – 21,4 миллион теңге;
- Абай облысы – 19,9 миллион теңге;
- Атырау облысы – 11 миллион теңге;
- Батыс Қазақстан облысы – 3,4 миллион теңге;
- Алматы облысы – 500 мың теңге;
- Түркістан облысы – 100 мың теңге;
- Жетісу облысы – 30 мың теңге.
Ал Шымкент қаласы мен Ұлытау облысында қайта есептеу жүргізілмейді, себебі бұл өңірлерде жылу тарифтері бастапқыда сыртқы ауа райының нақты температурасына қарай есептелген.
