Өңірлерге 4,5 миллион тонна көмір жеткізілді. Бұл туралы Энергетика министрлігінің мемлекеттік энергетикалық қадағалау және бақылау комитетінің төрағасы Ержан Ертаев мәлім етті, деп жазады F16.kz.
Е.Ертаевтың төрағалығымен өткен тұрғындар мен коммуналдық секторды көмірмен қамтамасыз ету мәселелері жөніндегі республикалық штабтың отырысында облыстарға қатты отынды жеткізу жайы да сөз болды.
Кездесуге Өнеркәсіп және құрылыс министрлігі, облыстар мен республикалық маңызы бар қалалардың әкімдіктері, «Қазақстан Темір Жолы» Ұлттық компаниясы, сондай-ақ ірі көмір өндіруші кәсіпорындардың өкілдері қатысты.
Отырыста өңірлердің көмір қоры бойынша жоспарлардың орындалуы, жүк вагонымен қамтамасыз ету, өңірлік операторлардың жұмысы туралы есептер тыңдалды.
Белгілі болғандай, биыл тұрғындар мен коммуналдық секторға қажетті көмір көлемі 7,4 миллион тонна деп белгіленсе, бүгінге дейін 4,5 миллион тонна немесе жоспардың 62 %-ы орындалған.
Сонымен бірге, кейбір өңірлерде ай сайынғы әрі жылдық жоспарға сәйкес көмірдің қолжетімділігі мен жеткізілуін бақылауды күшейту қажеттігі айтылды.
Отырыстың қорытындысы бойынша, өңірлік атқарушы органдар мен көмір өндіруші кәсіпорындарға өңірлерде көмірге жасанды ажиотаж жасауға жол бермеу жөнінде нақты тапсырмалар берілді.
