Мектептегі тамақтандыруды жетілдіру және қаржылық есеп айырысудың ашықтығын арттыру мақсатында салаға цифрлық технологиялар белсенді енгізілуде. Бұл туралы облыстық білім басқармасы басшысының орынбасары Алима Ақылбекқызы айтып берді, деп хабарлайды F16.kz.
Белгілі болғандай, жаңа оқу жылында облыстағы 108 мектепке «Әлеуметтік әмиян» жобасының аппараттық-бағдарламалық кешендері орнатылмақ. Тағы 191 мектеп «Бизнес әмиян» мобильді қосымшасы арқылы жүйеге қосылған.
– Бұл оқушылардың тамақтануына бақылауды күшейтіп, ата-аналармен және қызмет көрсетушілермен өзара байланыстың тиімділігін арттыруға жол ашады, – дейді басқарма басшысының орынбасары.
А.Ақылбекқызы мәлім ектендей, облыс мектептерінде тамақтандыруды ұйымдастыру жағы тұрақты бақылауда. Бүгінде 327 мектептің оқушылары ыстық тамақпен (оның ішінде 5-і – кейтерингтік) қамтамасыз етілген, 20 мектепте буфеттік тамақтану ұйымдастырылады. Бастауыш сынып оқушылары (41 239) және әлеуметтік осал санаттағы балалар (8 164) тегін тамақпен қамтылады. 2025 жылы осы мақсаттарға 6,1 миллиард теңге бөлініпті.
Тағы бір айта кетер жайт, 1 қыркүйектен бастап Денсаулық сақтау министрлігінің стандарттарына сәйкес жаңартылған мектеп мәзірі енгізіледі. Жаңа мәзірде қант пен тұз мөлшері бірнеше есеге азайып, көкөніс, жемістер, сүт өнімдерінінің үлесі артады.
