Еліміздегі мектептердің антитеррорлық қауіпсіздігіне қатысты 800-ден астам құқықбұзушылық анықталды, деп хабарлайды F16.kz тілшісі Ішкі істер министрлігіне сілтеме жасап.
ҚР ІІМ Әкімшілік полиция комитетінің төрағасы Қайсар Сұлтанбаевтың айтуынша, жаңа оқу жылы қарсаңында құқық қорғау органдарының мамандары білім беру мекемелерінің қауіпсіздігіне қатысты арнайы тексеріс жүргізген.
– Мектеп жанындағы инфрақұрылымға да зерделеу жұмыстарын жүргіздік. Тиісті ұсынымдар берілді. Мектептердің қасына жаяу жүргінші бағдаршамдары, жасанды кедергілер, жол белгілері мен ақпараттық паннолар, қоршаулар және автотұрақтар орнатылды. Бүгінге дейін талаптарға сәйкестендіру бойынша жұмыстың 95%-ы жүргізілді. Кемшіліктер әлі де бар, бірақ кейбір мәселе қаржы тапшылығына байланысты кезең-кезеңімен шешілетін болады, – деді Қайсар Сұлтанбаев.
Ол, сондай-ақ полиция қызметкерлері оқу орындарының антитеррорлық тұрғыдан қорғалуын, яғни нысандарда бейнебақылау камералары, дабыл түймелері, күзет ұйымдарының болуы сияқты жайттарды тексеретінін айтты.
Белгілі болғандай, осы жылғы тексерулер нәтижесінде антитеррорлық қауіпсіздік бойынша 800-ден аса құқық бұзушылық анықталған. Негізгі кемшіліктер арасында бейнежазбаларды сақтау мерзімінің қысқалығы, үздіксіз және резервтік энергия көздерінің жоқтығы, «соқыр аймақтардың» болуы сияқты түрлі техникалық ақаулар бар.
Тексеріс қорытындысы бойынша құқықбұзушылықтарға жол берген 141 білім мекемесінің басшысы әкімшілік жауапкершілікке тартылыпты. Оларға 43 миллион теңгенің айыппұлы салынған.
Әрбір оқу орнына аумақтық ІІО басшылары, ювеналдық полиция қызметкерлері, учаскелік инспекторлар және криминалдық полицияның жедел уәкілдері бекітіледі. Оларға оқу орындарына барып, сабақтар өткізу, жеке профилактикалық шаралар ұйымдастыру, мектеп әкімшілігі және ата-аналармен түсіндіру жұмыстарын жүргізу, бейнетаспалардағы жазбаларды көрсету сияқты міндеттер жүктелген.
– Кәмелетке толмағандар тарапынан немесе оларға қатысты құқықбұзушылық фактілері анықталса, тез арада полицияға хабарлау қажет. Уақтылы хабарламаған жағдайда әкімшілік жауапкершілік көзделген, – деп ескертеді мамандар.
