Қазақстан Еуразия кеңістігіндегі жетекші білім беру орталықтарының бірі ретінде өз позицияларын нығайтып келеді. 2025 оқу жылында еліміздің жоғары оқу орындарында 88 мемлекеттен келген 35 мыңнан астам шетелдік студент білім алып жатыр, деп хабарлайды F16.kz порталы Ғылым және жоғары білім министрлігіне сілтеме жасап.
– Шетелдік студенттер санының өткен жылмен салыстырғанда 11%-ға өсуі Қазақстанның сапалы білім беру бағдарламаларын, халықаралық академиялық орта мен кәсіби дамуға кең мүмкіндіктер ұсынатын толыққанды білім беру орталығын қалыптастыру кезеңінде екенін айқын көрсетеді, – деп жазады бейінді министрліктің баспасөз қызметі.
Шетелдік студенттердің құрылымы білім алушылар географиясының айтарлықтай кеңейгенін байқатады. Көш бастап тұрған мемлекеттер:
- Үндістан – 9 959;
- Түрікменстан – 9 089;
- Өзбекстан – 4 136;
- Қытай – 3 367;
- Ресей – 2 426.
Министрлік мәліметінше, Оңтүстік Азия, Орталық Азия және Қытайдан келетін студенттердің жоғары үлесі Қазақстанның медицина, инженерия, IT және әлеуметтік-экономикалық бағыттар бойынша бәсекелі білім беру бағдарламаларына сұраныс артқанын көрсетеді.
Белгілі болғандай, елімізде Алматы, Астана және Шымкент қалалары шетелдік студенттерді тартудың үш негізгі орталығы болып қалыптасты. Атап айтсақ, бүгінде Алматыда 18 195 студент оқып жатса, Астанада 4 292, ал Шымкент – 3 645 студент білім алуда.
Әсіресе, Әл-Фараби атындағы ҚазҰУ (4 497 студент), С.Асфендияров атындағы ҚазҰМУ (2 687), Л.Гумилев атындағы ЕҰУ (2 483), Қ.Сәтбаев атындағы ҚазҰТЗУ (1 759) мен М.Әуезов атындағы ОҚМУ (1 730) сияқты жоғары оқу орындарында білім алып жатқан шетелдік студенттердің саны айтарлықтай көп екен.
Тағы бір айта кетерлігі, білім беру бағыттары бойынша сұраныстың негізгі векторлары мынандай:
- Денсаулық сақтау және медицина – 12 950;
- Педагогика – 5 943;
- Бизнес және құқық – 4 539;
- Инженерия – 3 374;
- Ақпараттық технологиялар – 2 141.
– Министрлік ашықтық, интернационалдандыру және жаһандық академиялық кеңістікке интеграция саясатын жалғастырады, – деп жазады Ғылым және жоғары білім министрлігінің баспасөз қызметі.
