Риддерде «AMANAT» партиясының «Кедергісіз келешек» партиялық жобасы шеңберінде, «Жұмысшы мамандықтар жылы» аясында ерекше білім беру қажеттіліктері бар студенттер мен балалар арасында «Мамандық бойынша үздік – 2025» атты инклюзивті аспаздық байқау өтті. Іс-шара жастардың әлеуетін ашуға, олардың шығармашылық қабілеттерін дамытуға және қоғамда тең мүмкіндіктер мәдениетін қалыптастыруға бағытталды, деп хабарлайды F16.kz.
Байқаудың басты мақсаты – жастардың өзін-өзі танып, әлеуетін көрсетуіне жағдай жасау, ерекше білім беру қажеттіліктері бар адамдарға құрметпен қарау және жұмысшы мамандықтардың беделін арттыру. Сонымен қатар, іс-шара әлеуметтік инклюзияны дамытуды, теңдік, өзара көмек және толеранттылық қағидаттарын нығайтуды көздейді.
«Мамандық бойынша үздік – 2025» байқауы барысында қатысушылар практикалық тапсырмалар орындап, өздерінің кәсіби дағдыларын, шығармашылық көзқарасын және эстетикалық талғамын көрсетті. Тәжірибелік кезеңде аспаздар тағам әзірлеудің түпнұсқа тәсілдерін, еңбек мәдениетін және қауіпсіздік ережелерін сақтау бойынша бәсекеге түсті.
Ұйымдастырушылар командалық жұмысқа, өзара қолдауға және тапсырмаларды шығармашылық тұрғыдан орындауға ерекше көңіл бөлген.
– Біздің байқау – жай ғана кәсіби сайыс емес, ол қатысушылардың ішкі әлеуетін ашып, өз мүмкіндігіне сенуге жол ашатын ерекше алаң. Біз үшін бастысы – физикалық шектеулерге қарамастан, әрбір баланың бойындағы талант пен еңбекқорлықты көрсетуіне мүмкіндік беру. Осындай жобалар арқылы біз шынайы инклюзивті қоғам құруға қадам жасаймыз, – деді «AMANAT» партиясының Риддер қалалық филиалының төрағасы Әсем Агажаева.
«AMANAT» партиясы инклюзивті бағыттағы жобаларды жүйелі түрде қолдап келеді. Бұл шаралар ерекше жандардың әлеуетін ашып қана қоймай, қоғамда еңбек пен адам құқығын құрметтеу мәдениетін қалыптастыруға ықпал етеді.
Байқауға қатысушылардың бірі Ольга Журавлева өз әсерімен бөлісті:
– Мен бұл сайысқа алғаш рет қатыстым. Тағам әзірлеу – менің сүйікті ісім. Осындай байқаулар өзімізге деген сенімді арттырып, жаңа достар табуға мүмкіндік береді. Ең бастысы – бәріміз бір-бірімізді қолдадық, – дейді жас аспаз.
Байқау бағдарламасы аясында қатысушылардың шығармашылық жұмыстарының көрмесі ұйымдастырылып, тағамдардың дәмі бағаланды. Шара соңында үздік аспаздар марапатталып, барлық қатысушыға естелік сыйлықтар табысталды. Риддердегі инклюзивті байқау – тек аспаздық сайыс емес, ол әрбір адамның еңбегі мен талантының шексіз мүмкіндігін дәлелдеген өміршең жоба болды.
