Елімізде «Жұмысшы мамандықтар жылы» аясында техникалық және кәсіптік білім беру ұйымдары мен кәсіпорындар арасындағы әріптестік қарқын алып келеді, деп хабарлайды F16.kz тілшісі Оқу-ағарту министрлігіне сілтеме жасап.
– Мамандарды даярлау сапасын арттыру және білім мен өндіріс арасындағы байланысты нығайту мақсатында колледждер мен бизнес құрылымдардың әріптестік меморандумдары жүзеге асырылуда, – деп жазады Оқу-ағарту министрлігінің баспасөз қызметі.
Белгілі болғандай, бүгінде отандық 623 колледж түрлі саладағы 4 126 кәсіпорынмен келісімге қол қойған. Ортақ құжат аясында кәсіпорындар білім беру бағдарламаларын жаңартуға, колледждерді заманауи жабдықтармен қамтамасыз етуге, студенттерге өндірістік тәжірибе базасын ұсынуға міндеттеме алады. Қазірдің өзінде Алматы, Атырау, Қостанай, Павлодар және Ақтөбе облыстарындағы белсенді кәсіпорындар нақты салалардың қажеттіліктеріне сай кадр әлеуетін қалыптастыруға күш салып жатыр. Ал кейбір кәсіпорындар оқытушыларға арналған тағылымдамалар ұйымдастыруда.
– Колледждер мен кәсіпорындардың өзара ынтымақтастығы – түлектердің еңбек нарығындағы бәсекеге қабілеттілігін арттырудың және өңірлік экономиканың тұрақты дамуының кепілі. Оқу-ағарту министрлігі бұл бағыттағы жұмыстарды одан әрі қолдап, бизнес қауымдастықпен өзара іс-қимылды кеңейтуді жалғастыра беретін болады, – деді техникалық және кәсіптік білім департаментінің директоры Әсет Мұханбетов.
