Риддер шәрінде 12 жастағы мектеп оқушысының өліміне қатысты тергеу жүріп жатыр. Қайғылы оқиға өңір тұрғындарының алаңдаушылығын туғызды, деп хабарлайды F16.kz.
Әлеуметтік желілерде жазылғандай, 5-сынып оқушысы Артем Фоминых биылғы 5 мамырда үйінен шығып кеткен. Келесі күні таңертең оның денесі табылған. Марқұмның туыстары бала мектепте буллингке ұшырауы мүмкін екенін айтып отыр. Олардың сөзінше, жасөспірімді ұрып-соғып, ақша талап еткен. Жақындары баланың психологиялық қысымға шыдамай қалғанын алға тартады. Алайда буллингке қатысты бұл нұсқа әзірге ресми расталған жоқ.
Шығыс Қазақстан облысы полиция департаменті аталған жағдай бойынша қылмыстық іс қозғалғанын хабарлады.
Қазір оқиғаның мән-жайын толық, жан-жақты және объективті анықтауға бағытталған барлық қажетті тергеу амалдары жүргізіліп жатыр. Қазақстан Республикасының Қылмыстық-процестік кодексінің 201-бабына сәйкес өзге ақпаратты жария етуге болмайды, – деп жазды ШҚО ПД баспасөз қызметі.
