Жұмысшы мамандықтар жылы аясында Д.Серікбаев атындағы ШҚТУ-да ШҚО білім басқармасы және ҚР Оқу-ағарту министрлігі жанындағы «Talap» КЕАҚ-ның қолдауымен республикалық кәсіби шеберлік форумы ұйымдастырылды, деп хабарлайды F16.kz.
Жұмысшы мамандықтар жылы аясындағы өңірлік іс-шаралар жоспарын іске асыру шеңберінде өткен форумға Шығыс Қазақстан облысы әкімінің орынбасары Ербол Нұрғалиев қатысты.
Форумның мақсаты – мамандарды қазіргі заманғы стандарттар мен жұмыс берушілердің талаптарына сәйкес сапалы даярлауды қамтамасыз ету.
Ауқымды іс-шараға «Talap» КЕАҚ пен ШҚО кәсіпкерлер палатасының өкілдері, өңірдегі жоғары оқу орындары мен Астана және Алматы қалаларындағы, сондай-ақ Ақтөбе, Қызылорда, Жамбыл, Түркістан, Маңғыстау, Қарағанды, Абай және Шығыс Қазақстан облыстарындағы колледждердің директорлары мен педагогтер қатысты. Бұған қоса форум жұмысына «Казцинк», Үлбі металлургиялық зауыты, «Гидросталь», Өскемен жылу желілері сияқты әлеуметтік серіктестер де қатысқанын айту керек.
Форумның ашылуында сөз сөйлеген ШҚО әкімінің орынбасары Ербол Нұрғалиев өңір колледждерінің жұмыс берушілермен өзара тиімді серіктестігін атап өтіп, кәсіпкерлер палатасына, жұмыс берушілерге және колледждерге еңбек нарығының сұраныстарына байланысты кадрларды жедел даярлау мәселелерін бірлесіп пысықтауды ұсынды.
Мән-мағынасы зор іс-шара барысында кәсіби шеберліктің үздік тәжірибелерін тарату мәселелері талқыланды. Спикерлер білікті кадр даярлаудағы жұмыс берушілердің рөлі, дуалды оқыту аясындағы колледждер мен кәсіпорындардың ынтымақтастығы, білім берудегі инновациялық тәсілдер, инклюзивті білім беру және түлектерді жұмыспен қамтуға бейімдеу, білімді цифрландыру және кадр даярлаудың жаңа тәсілдері бойынша тәжірибелерімен бөлісті.
Форум білім беру саласы мен бизнес өкілдерінің ел экономикасы үшін сапалы кадр даярлау жолындағы ашық алаңына айналды. Айта кетейік, форум бағдарламасы 19 құзыреттілік бойынша 120-дан астам педагогтің қатысуымен өңіраралық кәсіби шеберлік байқауы өтіп жатқан колледж базаларында жалғасты.
