Д.Серікбаев атындағы Шығыс Қазақстан техникалық университетінің студенттері Қытайдың Тяньцзинь қаласында өткен World Vocational College Skills Competition 2025 халықаралық кәсіби шеберлік чемпионатында қола медальға ие болды, деп хабарлайды F16.kz.
Ғылым және жоғары білім министрлігінен хабарлағандай, World Vocational College Skills чемпионаты техникалық жоғары оқу орындары үшін кадр даярлау саласындағы ең ірі халықаралық іс-шаралардың бірі болып саналады. Биылғы чемпионатқа 76 елден 33 мыңнан астам қатысушы, 8 956 команда қатысқан.
Қазақстан атынан «Лу Бань» шеберханасының студенттері «Электромобильдер» құзыреттілігі бойынша жоғары нәтиже көрсетті. Финалдық кезең қорытындысы бойынша Қазақстан командасы қола медальмен марапатталды. Бұл жетістік еліміздегі техникалық білім сапасының артуын, халықаралық ынтымақтастықтың кеңеюін және технологиялар трансфері жобаларының тиімді жүзеге асып жатқанын айғақтайды.
Қазақстанда «Лу Бань» шеберханасы ҚР Ғылым және жоғары білім министрлігі мен Тяньцзинь кәсіптік институтының қолдауымен ашылған. Шетелдік серіктестік негізіндегі шеберханалар, бірлескен бағдарламалар және халықаралық дайындық орталықтары бәсекеге қабілетті инженерлік кадрлар даярлауда маңызды рөл атқарып келеді. Мұндай инфрақұрылым заманауи технологияларды меңгеруге мүмкіндік беріп, жастардың жаһандық кәсіби алаңдарға шығуына жол ашады.
– Қазақстандық студенттердің бұл жетістігі техникалық білім беру жүйесінің әлеуетін және елдің халықаралық білім беру кеңістігіне табысты интеграцияланып келе жатқанын көрсетеді, – деп хабарлайды Ғылым және жоғары білім министрлігінің баспасөз қызметі.
